გერმანიის თანხმობა თუ არ იქნება, პოლონეთი მაინც გადასცემს Leopard-ის ტიპის ტანკებს უკრაინას „მცირე კოალიციის“ ფარგლებში - მათეუშ მორავიეცკი

პოლონეთის პრემიერ-მინისტრ მათეუშ მორავიეცკის განცხადებით, ვარშავა მიმართავს ბერლინს Leopard 2-ის ტიპის ტანკების გაგზავნის ნებართვის მოთხოვნით, თუმცა თუ თანხმობა არ იქნება, პოლონეთი მაინც გადასცემს ტანკებს უკრაინას „მცირე კოალიციის“ ფარგლებში. ამის შესახებ მათეუშ მორავიეცკიმ პოლონურ მედიასთან ინტერვიუში განაცხადა.

მორავიეცკიმ თქვა, რომ ბერლინში თანხმობის გაგზავნის ოფიციალური მოთხოვნა "მეორეხარისხოვანი" საკითხია. მისივე თქმით, გერმანიის საგარეო საქმეთა მინისტრის, ანალენა ბერბოკის განცხადებამ, რომ ბერლინი მზადაა, პოლონეთს მისცეს უფლება ტანკები გაუგზავნოს უკრაინას, იმედის ნაპერწკალი გააჩინა.

„ზეწოლას აქვს მნიშვნელობა. ჩვენი ძალისხმევა, რომელიც მიმართულია იმ ქვეყნების კოალიციის შექმნისკენ, რომელთაც სურთ, დაეხმარონ უკრაინას ამ დრამატულ ბრძოლაში, ეფექტური აღმოჩნდა“, – განაცხადა მორავიეცკიმ.

მისი თქმით, გერმანიას ნამდვილად შეუძლია უკრაინის დახმარება.

„გერმანიას აქვს 350 აქტიურ Leopard-ზე“ მეტი და 200 მათგანი რეზერვშია. მათ ნამდვილად შეუძლიათ, დაეხმარონ უკრაინას, რომელიც დღეს იბრძვის. ეს არის ბრძოლა ევროპაში უსაფრთხოებისა და მშვიდობისთვის“,- განაცხადა პოლონეთის პრემიერ-მინისტრმა.