გიორგი ვაშაძის დღევანდელი გამოსვლა იყო ფარისევლობის, სიყალბის პერფორმანსი და მაგალითი, როგორ არ უნდა მოიქცეს პოლიტიკოსი - ღარიბაშვილი

გიორგი ვაშაძის დღევანდელი გამოსვლა იყო ფარისევლობის, სიყალბის პერფორმანსი და იმის მაგალითი, როგორ არ უნდა მოიქცეს პოლიტიკოსი, – ამის შესახებ ირაკლი ღარიბაშვილმა „სტრატეგია აღმაშენებლის“ ლიდერის, გიორგი ვაშაძის გამოსვლასთან დაკავშირებით პარლამენტში განაცხადა, სადაც პრემიერს დღეს ინტერპელაციის წესით უსმენენ.

როგორც ღარიბაშვილმა აღნიშნა, ვაშაძის გამოსვლა იყო საზოგადოების შეურაცხყოფა.

„ჩვენ ახლა მოვისმინეთ გიორგი ვაშაძის ემოციური გამოსვლა. რა თქმა უნდა, არ ვაპირებ ემოციების დახარჯვას, ენერგიის დაზოგვა მაქვს გადაწყვეტილი. ერთი რამ მინდა გითხრათ, თქვენი დღევანდელი გამოსვლა იყო ფარისევლობის და სიყალბის პერფორმანსი და მაგალითი იმისა, როგორ არ უნდა მოიქცეს პოლიტიკოსი. ეს არის ფარისევლობა, სიყალბე, ტყუილი, რასაც თქვენ აკეთებთ და რაც ჩაიდინეთ. ამას გარდა, თქვენ შეურაცხყოფა მიაყენეთ ჩვენს საზოგადოებას, ჩვენი მოსახლეობის აბსოლუტურ უმრავლესობას, ჩვენს დეპუტატებს, ჩვენ ყველას. ამ დროს, რეალურად, მე მქონდა განცდა, რომ თქვენ საკუთარ თავზე ლაპარაკობდით", - თქვა ღარიბაშვილმა.

გიორგი ვაშაძემ ირაკლი ღარიბაშვილს მიმართა და უთხრა, რომ ის არის დამნაშავე, იმაში რომ დღეს საქართველოს არ აქვს ევროკავშირის სტატუსი.