უკრაინამ საჰაერო თავდაცვის სისტემები NASAMS და Aspide მიიღო

უკრაინამ მიიღო საზენიტო-სარაკეტო სისტემები NASAMS და Aspide. ამის შესახებ ტვიტერზე უკრაინის თავდაცვის მინისტრი ოლექსეი რეზნიკოვი წერს.

„ნახეთ, ჩამოვიდა. ეს იარაღი მნიშვნელოვნად გააძლიერებს უკრაინის არმიას და ჩვენს ცას უფრო უსაფრთხოს გახდის," - წერს რეზნიკოვი. ის პარტნიორებს - ნორვეგიას, ესპანეთსა და აშშ-ს მადლობას უხდის.

NASAMS აშშ-ისა და ნორვეგიის მიერ ერთობლივად შექმნილი საშუალო რადიუსის მობილური საზენიტო-სარაკეტო სისტემაა. ის განკუთვნილია საჰაერო სამიზნეების გასანადგურებლად დაბალ და საშუალო სიმაღლეზე.

აშშ-ის ეროვნული უსაფრთხოების საბჭოს წარმომადგენელმა ჯონ კირბიმ ადრე განაცხადა, რომ ამერიკა აპირებს, უკრაინას მიაწოდოს ამ თანამედროვე საჰაერო თავდაცვის სისტემის რვა ერთეული.

27 ოქტომბერს, შეერთებული შტატების თავდაცვის მდივანმა ლოიდ ოსტინმა ჟურნალისტებს განუცხადა, რომ ნოემბრის დასაწყისში, აშშ უკრაინას გადასცემს საჰაერო თავდაცვის თანამედროვე სისტემებსაც (NASAM). ლაპარაკია 2 ერთეულზე.

Aspide უკრაინას ესპანეთმა გადასცა. ახლო მოქმედების ჰაერსაწინააღმდეგო თავდაცვის ამ სისტემას 12 კილომეტრის რადიუსში 6 კილომეტრის სიმაღლეზე არსებული სამიზნეების განადგურება შეუძლია.