რუსეთის სამხედრო ხელმძღვანელობა უკრაინაში ბირთვული იარაღის გამოყენებას განიხილავდა - The New York Times

გამოცემა The New York Times-ი წყაროებზე დაყრდნობით წერს, რომ რუსეთის სამხედრო მეთაურები უკრაინის წინააღმდეგ ბირთვული იარაღის გამოყენებას განიხილადნენ. გამოცემა წერს, რომ აღნიშნულ საკითხზე დისკუსიებში ვლადიმირ პუტინი არ მონაწილეობდა.

გამოცემის რამდენიმე წყაროს ინფორმაციით, რუსი სამხედრო მაღალჩინოსნები განიხილადნენ, მოსკოვს როდის და როგორ უნდა გამოეყენებინა ტაქტიკური ბირთვული იარაღი უკრაინაში. აშშ-ის ხელისუფლებისათვის  ამის შსახებ ცნობილი ოქტომბრის შუა რიცხვებში გახდა, დისკუსიები კი „ცოტა ხნის წინ“ მიმდინარეობდა.

გამოცემა აღნიშნავს, რომ ამგვარი დისკუსიების ფაქტი იმაზე მეტყველებს, თუ რამდენად იმედგაცრუებულები არიან რუსი გენერლები სახმელეთო ოპერაციების წარუმატებლობით და რომ ვლადიმირ პუტინის მუქარა ბირთვული იარაღის გამოყენებაზე, შესაძლოა, მხოლოდ სიტყვები არ იყოს.

ამასთან, ამერიკელმა მაღალჩინოსნებმა NYT-ს უთხრეს, რომ ვერ ნახეს რაიმე მტკიცებულება იმისა, რომ რუსეთს გადაჰქონდა ბირთვულ იარაღი ან სხვა ნაბიჯებს დგამდა დარტყმის მოსამზადებლად.

პენტაგონის შეფასებით, რუსეთის არსენალშია ტაქტიკური ბირთვული იარაღის 2 000-მდე ერთეული. ასეთი შეიარაღება ბრძოლის ველზე არასდროს გამოყენებულა.