რუსეთი „მარცვლეულის შეთანხმებას“ დაუბრუნდა - მედია

რუსეთის თავდაცვის სამინისტროს ოფიციალურმა წარმომადგენელმა, იგორ კონაშენკოვმა განაცხადა,  რომ რუსეთი „მარცვლეულის შეთანხმებას“ დაუბრუნდა.

მისივე თქმით, გადაწყვეტილებას წინ უძღოდა უკრაინისგან წერილობითი გარანტიები, რომ „მარცვლეულის დერეფანი“ მოსკოვის წინააღმდეგ საბრძოლო მოქმედებების საწარმოებლად არ იქნება გამოყენებული.

„შევძელით, მიგვეღო აუცილებელი წერილობითი გარანტიები სასოფლო-სამეურნეო პროდუქციისთვის ჰუმანიტარული დერეფნისა და რუსეთის წინააღმდეგ სამხედრო ოპერაციების ჩასატარებლად უკრაინის პორტების გამოუყენებლობის შესახებ. რუსეთის ფედერაციას მიაჩნია, რომ ამ მომენტში მიღებული გარანტიები საკმარისია და განვაახლებთ შეთანხმების შესრულებას“, – აცხადებენ სამინისტროში.

ცნობისათვის, რამდენიმე დღის წინ მოსკოვმა კიევი შავი ზღვის ფლოტზე თავდასხმაში დაადანაშაულა და გაერო-სა და თურქეთის შუამავლობით მიღწეული მარცვლეულის ექსპორტის შეთანხმებიდან გასვლის შესახებ განაცხადა.