ომი გაგრძელდება იმდენ ხანს, რამდენიც უკრაინის გამარჯვებას დასჭირდება - დმიტრო კულება

უკრაინის საგარეო საქმეთა მინისტრმა დმიტრო კულებამ განაცხადა, ურომ უკრაინაში მიმდინარე ომს რომელიმე სხვა ქვეყნის ომთან არ შეადარებს, რათა ომის ხანგრძლივობა განსაზღვროს.

„სინამდვილეში, ეს ომი გაგრძელდება იმდენ ხანს, რამდენიც უკრაინის გამარჯვებას დასჭირდება, რომელიც აუცილებლად დადგება“, - თქვა კულებამ ТСН-თან ინტერვიუში.

კულებამ უკრაინელებს მოუწოდა, მზად იყვნენ იმისთვის, რომ გამარჯვებას დრო დასჭირდება. რამდენი იქნება ეს დრო - კვირა, თვე, ნახევარი წელი, წელიწადი, უცნობია. ამიტომ მისი თქმით, არ ღირს დედლაინების შედგენა „ზამთრამდე“ ან „გაზაფხულამდე“.

მინისტრმა აღნიშნა, რომ მას შემდეგ, რაც უკრაინელებმა სრულმასტაბიანი ომის პირველივე კვირას მედგარი წინააღმდეგობა აჩვენეს, სხვა ქვეყნებმაც ირწმუნეს მათი. მანამდე კი მსოფლიოში ბევრი ფიქრობდა, რომ უკრაინა რუსეთის შეტევას რამდენიმე დღეც ვერ გაუძლებდა.

კულება დარწმუნებული იყო, რომ მას შემდეგ, რაც უკრაინაში რუსული ძალების დანაკარგი 10 ათასს გადააჭარბებდა, რუსეთი გაჩერდებოდა, მაგრამ ახლა ამბობს, რომ შეცდა და რომ პუტინი არ უფრთხილდება თავისი მოქალაქეების სიცოცხლეს.

 „მიაქციეთ ყურადღება, ევროპისა და ჩრდილოეთ ამერიკის ქვეყნების ლიდერების განცხადებებს, ისინი მკაფიოდ ამბობენ, რომ უკრაინის დახმარება იმდენ ხანს გაგრძელდება, რამდენიც საჭირო იქნება. ომის დასაწყისში, პირველ თვეებში ასეთი განცხადებები არ ყოფილა“, - განაცხადა კულებამ.