თუ ჭურვი მოფრინდება ჩვენს რეგიონში, ქალაქები უნდა გავასწოროთ მიწასთან, ისე, რომ გამოჩნდეს შორი ჰორიზონტი, დონ - კადიროვი უკრაინაში ომის მსვლელობით ისევ უკმაყოფილოა

ჩეჩნეთის ლიდერი რამზან კადიროვი უკრაინაში ომის მსვლელობით ისევ უკმაყოფილოა. ის თავის შეშფოთებას ტელეგრამ-არხზე გამოთქვამს და უკრაინაში საბრძოლო მოქმედებებს ომს უწოდებს.

 „ადრე ჩვენ ვამბობდით, რომ ვატარებთ სპეციალურ სამხედრო ოპერაციას უკრაინის ტერიტორიაზე, მაგრამ ეს უკვე ომია, უკვე ომი მიმდინარეობს ჩვენ ტერიტორიაზე, დონ... მე ძალიან უკმაყოფილო ვარ, დონ“, - ამბობს კადიროვი.

როგორც ადრე, ის ახლაც მოუწოდებს ესკალაციისკენ. კადიროვი მტკიცებულებების გარეშე ლაპარაკობს უკრაინის მხრიდან დარტყმებზე „რუსეთის“ ტერიტორიაზე {უკრაინის ოკუპირებულ ტერიტორიებზე} და ამბობს: „ჩემი აზრით სუსტად ვპასუხობთ. თუ ჭურვი მოფრინდება ჩვენს მხარეს, ჩვენს რეგიონში, ქალაქები უნდა გავასწოროთ მიწასთან, დონ, ისე, რომ გამოჩნდეს შორი ჰორიზონტი, დონ“. კადიროვს მიაჩნია, რომ დასავლეთმა ამოწურა საპასუხო ზომების შესაძლებლობები. „უარესი აღარ იქნება, დონ. ევროპას არ აქვს ძალები“, - ამბობს კადიროვი.

კადიროვმა ადრე განაცხადა, რომ ჩეჩნეთში ნაწილობრივი მობილიზაცია არ განხორციელდებოდა, რადგან რესპუბლიკამ მებრძოლების გაგზავნის მხრივ გეგმას გადააჭარბა. მაგრამ ახლა ის ფიქრობს, რომ ჩრდილოეთ კავკასიის ხალხებმა გაცილებით მეტი მებრძოლი უნდა გაგზავნონ არმიაში, მათ შორის ჩეჩნებმაც. „გაოცებული ვარ, რამდენი ჩეჩენი მოხალისე იბრძვის, დონ, მაგრამ მაინც ცოტაა, დონ! ჩვენ თითქმის მილიონ ექვსასი ათასი ვართ, დონ. მათგან 300-400 ათასი მაინც {უნდა წავიდეს}, დონ...“- ამბობს კადიროვი.