სისტემური პრობლემა არ ვლინდება, კალაძის პოლიტიკურ პასუხისმგებლობაზე საუბარი არის სპეკულაცია - კობახიძე

სისტემური პრობლემა არ ვლინდება. ასეთ პირობებში მერის, კახი კალაძის პოლიტიკურ პასუხისმგებლობაზე საუბარი, არის ცარიელი სპეკულაცია, - ამის შესახებ პარტია „ქართული ოცნება - დემოკრატიული საქართველოს“ თავმჯდომარემ, ირაკლი კობახიძემ ვაკის პარკში მომხდარ ტრაგედიასთან დაკავშირებით განაცხადა.

მისი თქმით, ამ შემთხვევაში ადგილი ჰქონდა გულგრილობას, რამაც  ტრაგიკული შედეგი გამოიწვია.

„ამ შემთხვევაში ჩვენ გვაქვს რადიკალურად განსხვავებული სურათი. ამ 5 წლის განმავლობაში, კახი კალაძის ხელმძღვანელობით თბილისის მერიაში ათასობით პროექტი განხორციელდა და ეს პროექტები გამორჩეული იყო მაღალი ხარისხით, როგორც ვიზუალური, ასევე, ტექნიკური თვალსაზრისით. აქედან გამომდინარე, არათუ სისტემური პრობლემა არ არსებობს,პირიქით, სისტემურად პროექტები ხორციელება წარმატებით.

ამ შემთხვევაში იყო კონკრეტული გადაცდომა, გულგრილობა, რამაც გამოიწვია ტრაგიკული შედეგი. რაც შეეხება სისტემურ პრობლემას, ასეთი პრობლემა არ ვლინდება. ასეთ პირობებში მერის, კახი კალაძის პოლიტიკურ პასუხისმგებლობაზე საუბარი, არის ცარიელი სპეკულაცია და აბსოლუტურად უადგილო," - თქვა კობახიძემ.