ილონ მასკის კომპანია აცხადებს, რომ უკრაინისთვის Starlink-ის ინტერნეტის უფასოდ მიწოდებას ვეღარ შეძლებს და პენტაგონს დაფინანსების თხოვნით მიმართავს

CNN-ის ინფორმაციით, ილონ მასკის კომპანია SpaceX-მა პენტაგონს მიმართა, რომ უკრაინაში Starlink-ის სატელიტური საკომუნიკაციო კომპლექსების ექსპლუატაციის დაფინანსება თავის თვზე აიღოს.

კომპანიის წერილში აღნიშნულია, რომ აღარ შეუძლია Starlink-ის სერვისის დაფინანსება და იმ შემთხვევაში, თუ პენტაგონს სურს უკრაინის მთავრობისა და შეიარაღებული ძალებისთვის Starlink-ის სერვისის უფასოდ მიწოდება, მათ ის თვითონ უნდა დააფინანსონ, რაც მიმდინარე წლის ბოლომდე $120 მილიონზე მეტი ღირს, ხოლო შემდეგი 12 თვისთვის დაახლოებით $400 მილიონი.

„სიენენის“ ინფორმაციით, კომპანიის მიერ პენტაგონში გაგზავნილ დოკუმენტებს შორის არის გენერალ ვალერი ზალუჟნის მიერ SpaceX-სთვის გაგზავნილი მოთხოვნა დამატებით 8 000 ტერმინალის მიწოდების შესახებ.

კომპანიაში აღნიშნავენ, რომ რთულ მდგომარეობაში არიან და არ აქვთ ფინანსური შესაძლებლობა, დააკმაყოფილონ გენერალი ზალუჟნის თხოვნა დამატებითი ტერმინალის ან სერვისის მიწოდების უზრუნველყოფასთან დაკავშირებით.

"ჩვენ არ ვართ იმ პოზიციაში, რომ განვაგრძოთ ტერმინალების უფასოდ მიცემა უკრაინისთვის, ან დავაფინანსოთ აღნიშნული ტერმინალები განუსაზღვრელი ვადით". – წერია SpaceX-ის წერილში.

ომის დაწყების შემდეგ ილონ მასკმა Starlink-ის ათეულობით ტერმინალი უკრაინას უსასყიდლოდ გადასცა. Starlink-ის ტერმინალებით უკრაინელი სამხედროები ერთმანეთთან დაკავშირებას ახერხებენ. ასევე, უკრაინის მშვიდობიან მოსახლეობას ინტერნეტი Starlink-ის ტერმინალით მიეწოდება.