იზიუმში, სამარხში აღმოჩენილი ცხედრების 99%-ს წამების კვალი აღენიშნება - სინეგუბოვი

იზიუმში მასობრივ სამარხში აღმოჩენილი ცხედრების 99 პროცენტს წამების კვალი აღენიშნება. ამის შესახებ ხარკოვის ოლქის სამხედრო ადმინისტრაციის ხელმძღვანელი ოლეგ სინეგუბოვი აცხადებს.

„იზიუმში ოკუპანტების მიერ ჩადენილი დანაშაულების მასშტაბები ძალიან დიდია. ეს არის სისხლიანი სასტიკი ტერორი. ბუჩა, ირპინი, მარიუპოლი... იზიუმი. ეს არის უკრაინელი ხალხის გენოციდი. მშვიდობიანი მოქალაქეების 450 ცხედარი, რომელსაც აღენიშნება წამების კვალი, ტყეში იყო დასაფლავებული.

მსგავსი რამ წარმოუდგენელია 21-ე საუკუნეში, მაგრამ დღეს ეს იზიუმის ტრაგედია რეალობაა. ბევრ სამარხზე მითითებული არ არის სახელები. ცხედრებს შორის, რომელთა ექსგუმაცია დღეს მოხდა, 99 პროცენტი წამებით არის მოკლული. არის ცხედრები, რომლებსაც ხელები ზურგს უკან აქვთ შეკრული, ერთი ადამიანი კი ყელზე მოჭერილი თოკით არის დამარხული. აშკარაა ეს ადამიანები აწამეს და სიკვდილით დასაჯეს. დასაფლავებულებს შორის არიან ბავშვებიც“, - განაცხადა სინეგუბოვმა.

მისი თქმით, ამჟამად ადგილზე მუშაობს 200-მდე სამართალდამცველი და ექსპერტი. მისივე თქმით, ცხედრები გადაიგზავნება სამედიცინო ექსპერტიზაზე, რათა დადგინდეს სიკვდილის მიზეზები.

 „ვინაობის დადგენის შემდეგ ყველა დაღუპული დაიკრძალება პატივით. ყოველი გამოძიებული შემთხვევა გახდება სამხედრო დანაშაულების მტკიცებულება საერთაშორისო სასამართლოებში“, - აღნიშნა სინეგუბოვმა.