თურქეთის თავდაცვის მინისტრის განცხადებით, რუსეთი ოდესის პორტის დაბომბვასთან კავშირს უარყოფს

თურქეთის თავდაცვის მინისტრ ჰულუსი აკარის განცხადებით, შაბათს, 23 ივლისს რუსეთის ოფიციალურმა პირებმა ანკარას აცნობეს, რომ ოდესის პორტის დაბომბვასთან „არანაირი კავშირი არ აქვთ“.

 „რუსეთთან ჩვენი კონტაქტისას მათ გვითხრეს, რომ ამ თავდასხმასთან აბსოლუტურად არანაირი კავშირი არ აქვთ, ასევე გვითხრეს, რომ ისინი ამ საკითხს ყურადღებით და დეტალურად შეისწავლიან“, - განუცხადა აკარმა ჟურნალისტებს.

თურქეთი შეშფოთებულია, რომ ოდესაში აფეთქებები მარცვლეულის ექსპორტზე შეთანმებაზე ხელმოწერის შემდეგ უმალვე მოხდა. შეთანხმებას, რომელიც 22 ივლისს, სტამბოლში რუსეთსა და უკრაინას შორის გაფორმდა, ესწრებოდნენ თურქეთის პრეზიდენტი რეჯებ თაიფ ერდოღანი და გაეროს გენერალური მდივანი ანტონიო გუტერეში.

შეგახსნებეთ, უკრაინული მარცვლელის ექსპორტისა და პორტების განბლოკვის შესახებ შეთანხმებიდან რამდენიმე საათში, რუსეთის ძალებმა ოდესის პორტზე სარაკეტო იერიში მიიტანა.

"მტერმა იერიში მიიტანა ოდესის საზღვაო სავაჭრო პორტის წინააღმდეგ „კალიბრის“ ტიპის ფრთოსანი რაკეტებით. ორი რაკეტა ჩამოაგდო საჰაერო თავდაცვამ, ორი პორტის ინფრასტრუქტურის ობიექტებს მოხვდა", - იტყობინება უკრაინის ოპერატიული სარდლობა "სამხრეთი".

უკრაინის საგარეო საქმეთა სამინისტრომ განაცხადა, რომ რუსეთის იერიში ოდესის პორტის წინააღმდეგ ეს არის სახეში შეფურთხება, გაეროს გენერალური მდივნის ანტონიო გუტერეშისა და თურქეთის პრეზიდენტ რეჯებ თაიფ ერდოღანისთვის რომლებმაც უდიდესი ძალისხმევა გასწიეს, რომ უკრაინული მარცვლეულის ექსპორტის შეთანხმებისთვის მიეღწიათ.