რუსი ოლიგარქი ივანიშვილი გვართმევს ევროპული მომავლის შანსს - ნუგზარ წიკლაური

დღეს, ერთიანი ნაციონალური მოძრაობის ცენტრალურ ოფისში პარტიის პოლიტიკური საბჭოს წევრმა ნუგზარ წიკლაურმა ბრიფინგი გამართა და გამოეხმაურა "ქართული ოცნების" ლიდერების ბოლოდროინდელ განცხადებებს.

მისი თქმით, მმართველი პარტიის წარმომადგენლების მიერ გავრცელებული წერილები არის შიშით გამოწვეული და ემსახურება ივანიშვილისთვის ერთგულების დამტკიცებას.

"ორგანიზებული კამპანიის ერთადერთი მიზანია რუსი ოლიგარქის - ივანიშვილის დაცვა ევროპისგან, ამერიკისგან, მთლიანად თავისუფალი სამყაროსგან, პოლიტიკური ოპოზიციისგან", - ამბობს ნუგზარ წიკლაური.

"ამ წერილებში, პოსტებში, მიმართვებში არაფერი წერია საქართველოზე - მათი ავტორების საზრუნავი მხოლოდ ბიძინას ფულია და ისინი მზად არიან საქართველოს ეროვნული ინტერესები გადააყოლონ ივანიშვილის ფინანსებს", - აღნიშნავს წიკლაური.

წიკლაურის განცხადებით, აღნიშნული კამპანია არის დასტური იმისა, რომ "ქართული ოცნება" არ აპირბეს სასამართლოს რეფორმის გატარებას, დეოლიგარქიზაციასა და მედიაზე ტერორის შეწყვეტას. არ აპირბეს შეასრულოს ევროკავშირის მიერ დადგენილი მოთხოვნები, რითიც კლავს საქართველოს ევროპულ პერსპექტივას.

"ქართველმა ხალხმა - ასიათასობით თავისუფალმა მოქალაქემ ამ დღეებში კვლავ დაადასტურა, რომ მას სურს ევროპული განვითარება, მომავალი და თავისუფლება საკუთარი სამშობლოსთვის და ოჯახებისთვის", - დასძინა წიკლაურმა.

ნუგზარ წიკლაურმა ასევე აღნიშნა ისიც, რომ დღეს ერთადერთი დაბრკოლება, რომელიც აშორებს ქართველ ხალხს ევროპული ოჯახისგან არის რუსი ოლიგარქი ივანიშვილი.