ნატო-ში უკრაინის გაწევრიანებამ, შესაძლოა, მესამე მსოფლიო ომი გამოიწვიოს - მედვედევი

ნატო-ში უკრაინის გაწევრიანებამ, შესაძლოა, მესამე მსოფლიო ომი გამოიწვიოს, თუ ის ყირიმის ხელყოფას შეეცდება. ამის შესახებ რუსეთის უშიშროების საბჭოს ხელმძღვანელის მოადგილემ დმიტრი მედვედევმა განაცხადა.

„ყირიმის ხელყოფის ნებისმიერი მცდელობა ჩვენი ქვეყნისთვის ომის გამოცხადება იქნება. და თუ ამას გააკეთებს ნატო-ს წევრი ქვეყანა, ეს იქნება კონფლიქტი  მთელ ჩრდილოატლანტიკურ ალიანსთან. მესამე მსოფლიო ომი. ტოტალური კატასტროფა“, - თქვა მედვედევმა „არგუმნეტი ი ფაქტან“ ინტერვიუში.

მისი თქმით, ნატო-ში შვედეთისა და ფინეთის გაწევრიანება უფრო უსაფრთხოა რუსეთისთვის.

„ნატო-ში შვედეთისა და ფინეთის გაწევრიანება არაფრით გვემუქრება. ამ ქვეყნებს ადრე რუსეთთან ჰქონდათ ურთიერთობა, რომელსაც შეიძლება ვუწოდოთ კეთილგანწყობილი. თუმცა წარსულში სხვადასხვა რამ მოხდა. ჩვენ ამჟამად ამ ქვეყნებთან არ გვაქვს და არ გვექნება ტერიტორიული დავები“, - თქვა მედვედევმა.

„თუ კი ისინი ალიანსში გაწვერიანებით თავს უკეთესად და მშვიდად იგრძნობენ, წარმატებებს ვუსურვებ. ნატო ისედაც ჩვენს ქვეყნასთან ახლოსაა შვედეთისა და ფინეთის გარეშეც“, - დასძინა მედვედევმა.

მისი თქმით, რუსეთისთვის უფრო დიდ საფრთხეს წარმოადგენს უკრაინა ნატო-ში. მედვედევი ამბობს, რომ  ამის მიზეზი უკრაინასთან დაურეგულირებული ტერიტორიული დავები და რეგიონის სტატუსის შესახებ განსხვავებული შეხედულებებია.