სალომე ზურაბიშვილის საარჩევნო კამპანია იყო უმძიმესი, რომლის გახსენებაც არ მინდა, მაშინაც არ გვიჯერებდა - ირაკლი კობახიძე

პრეზიდენტის საარჩევნო კამპანია იყო საარჩევნო კამპანია, რომლის გახსენებაც არ მინდა, უმძიმესი იყო, –ამის შესახებ პარტია „ქართული ოცნების“ თავმჯდომარემ, ირაკლი კობახიძემ საქართველოს პირველი არხის გადაცემაში „დღის თემა“ სალომე ზურაბიშვილზე საუბრისას განაცხადა.

„მაშინაც არ გვიჯერებდა. როცა კანდიდატი არ მოგყვება კამპანიაში, ამ შემთხვევაში ძალიან მძიმეა კამპანიის წარმოება. აი, ტექნიკური საკითხებიც რომ ავიღოთ, კლიპი იყო რაღაცნაირად გადასაღები და იქაც კი არ მოგვყვებოდა კლიპის გადაღებაში. ან, რაღაც აქცია იყო დასაორგანიზებელი, უარს ამბობდა მოსვლაზე და ა.შ. ჩვენ გვქონდა გამოცდილი პიარული გეგმა და ამაში არ მოგვყვებოდა. მერე იყო კონკრეტული განცხადებები, რაზეც წინასწარ ვაფრთხილებდით, რომ არ უნდა გაეკეთებინა და სამწუხაროდ, მაინც გააკეთა. მაგალითად, აგვისტოს ომთან დაკავშირებით განცხადება. ჯერ პირველი განცხადება გაკეთდა, მერე მოგვიწია ამის რაღაც შელამაზებ. მერე, სხვათა შორის, ოპოზიციამ პირადად მეც შემაქო ამასთან დაკავშირებით, კარგად შეალამაზაო, არ ეკუთვნოდა, მაგრამ მაინცო. მერე, მეორე ისეთი დაემატა, რომელიც რთულად შესალამაზებელი იყო და ა.შ. ასეთი რაღაცები იყო, მაგრამ ეს არის წარსული, რომლის გახსენებაც არ ღირს. დაყენებული იყო კანდიდატი და რა თქმა უნდა, ბოლომდე მივყევით ამ კამპანიას. მთავარი ამოცანა იყო, „ნაცმოძრაობა“ არ მოსულიყო საპრეზიდენტო ინსტიტუტის სათავეში“, – განაცხადა კობახიძემ.