ევროპარლამენტის რეზოლუციის შემდეგ, "ოცნება" კარგავს ამომრჩეველთა ნახევარზე მეტს, რაც "გორბი"-მაც აღმოაჩინა, მაგრამ არ გამოაქვეყნა - ოქრიაშვილი

პრეზიდენტის განცხადებასა და გორბის კვლევას შორის იკვეთება პირდაპირი კავშირი, - აცხადებს პარტია "პროგრესი და თავისუფლების" ლიდერი კახა ოქრიაშვილი.

ოქრიაშვილის თქმით, ივანიშვილის „ოცნებამ“, ბოლო ერთი თვეა, გახსნა საინფორმაციო ფრონტი ევროკავშირის წინააღმდეგ. 

"თუ „ოცნებას“ გულწრფელად სურს ევროკავშირის კანდიდატი ქვეყნის სტატუსის მიღება, მომავალი მთავარი პარტნიორის წინააღმდეგ მის მიერ პროპაგანდისტული ომის გაჩაღება ლოგიკას მოკლებულია. აშკარაა, „ოცნებამ“ ყველაფერი გააკეთა, რომ ევროკავშირმა არ მოგვანიჭოს კანდიდატი ქვეყნის სტატუსი და ამ თამაშში ჩაბმულ ივანიშვილს გამოეპარა მთავარი გარემოება: საკუთარი ამომრჩეველი დააყენა არჩევანის წინაშე - ან ევროპა, ან ივანიშვილი.

შედეგად, ევროპარლამენტის რეზოლუციის შემდეგ, „ოცნება“ კარგავს ამომრჩეველთა ნახევარზე მეტს, რადგან მათივე მხარდამჭერების აბსოლუტური უმრავლესობა პროევროპულად არის განწყობილი. ეს „გორბი“-მაც აღმოაჩინა, მაგრამ არ გამოაქვეყნა და ამ ფაქტს სხვა მიმდინარე კვლევებიც ადასტურებს. ასევე, არ გამოაქვეყნეს პასუხი კიდევ ერთ კითხვაზე - ივანიშვილმა რომ მოუწოდოს ქართველ ხალხს მეორე ფრონტის გახსნისკენ, დაეთანხმებიან, თუ არა. პასუხი ასეთია: მოსახლეობის 99%-ზე მეტს არ სურს ომი და არ აქვს მნიშვნელობა, ამისკენ ვინ მოუწოდებს, თუნდაც ეს იყოს ივანიშვილი.

პრეზიდენტის გამოსვლა და 16 ივნისს დაანონსებული მიტინგი ემსახურება „ოცნების“ გამოაშკარავებული პრორუსულობის გამო დაკარგული ამომრჩევლის დაბრუნებას. ეს მორიგი თაღლითური სვლაა პოლიტიკაში. ვფიქრობ, არც საქართველოს მოსახლეობა და არც ევროპული საზოგადოება აღარ მოტყუვდება.

დასკვნა, რომელიც 17 ივნისს უნდა გამოქვეყნდეს, უკვე დაწერილია და 16 ივნისის მიტინგი მასზე ზეგავლენას ვერ მოახდენს. ბატონმა ივანიშვილმა არ გაატარა შეთანხმებული და მოთხოვნილი დემოკრატიული რეფორმები და ამით ყველაფერი გააკეთა, რომ საქართველო ევროკავშირში არ მიიღონ. იმედს ვიტოვებ, ევროკავშირი გაითვალისწინებს ქართველი ხალხის აბსოლუტური უმრავლესობის, 90 %-ის სურვილს და მოგვანიჭებს კანდიდატი ქვეყნის სტატუსს პირობით, რომ დემოკრატიული რეფორმები უსწრაფესად განხორციელდება, რის გარანტიც სწორედ მოსახლეობის ეს 90 % იქნება.

ვუერთდები 20 ივნისის ზეპარტიულ, მშვიდობიან აქციას და ყველას მოვუწოდებ მასში მონაწილეობისკენ", აცხადებს ოქრიაშვილი.