"ნაციონალური მოძრაობის" ლიდერი არის ნიკა მელია, მე საერთაშორისო მასშტაბით აღიარებული პოლიტპატიმარი ვარ - სააკაშვილი

"ენმ-ს ჰყავს ლიდერების მთელი თანავარსკვლავედი, მათ შორის ნიკა მელია - პარტიის მთავარი ლიდერი" - ამის შესახებ საქართველოს მესამე პრეზიდენტი მიხეილ სააკაშვილი "ვივამედიდან" გავრცელებულ განცხადებაში წერს:

"ხშირად არა, მაგრამ ზოგჯერ ვუთმობ დროს ქართული პოლიტიკური გადაცემების ყურებას და მათ შორის ძალიან ბევრ ტელეგადაცემაში მომიხსენიებენ, როგორც "ნაციონალური მოძრაობის" ლიდერს.

მინდა ყველას ვუთხრა, "ნაციონალურ მოძრაობას" ჰყავს ლიდერების მთელი თანავარსკვლავედი, მათ შორის დემოკრატიულად არჩეული და არა დანიშნული პარტიის თავმჯდომარე, ნიკა მელია და სწორედ ის არის დღეს პარტიის მთავარი ლიდერი.

რაც შემეხება მე. მე დღესდღეობით უკვე საერთაშორისო მასშტაბით აღიარებული პოლიტპატიმარი ვარ, რომელსაც მაქსიმალურად შეზღუდული აქვს კომუნიკაციები და წარმოუდგენელია, ძალიანაც რომ მოვინდომო, შევძლო რაიმე პარტიული საქმიანობის სრულფასოვნად წარმართვა. მითუმეტეს, ამაში ხელს არც ჯანმრთელობა მიწყობს. ამ განმარტების გაკეთება აუცილებლად ჩავთვალე", - წერს მიხეილ სააკაშვილი.