თელავში, ერეკლე მეორის სასახლესთან აქცია გაიმართა

თელავში, მეფე ერეკლე მეორის სასახლესთან აქცია გაიმართა.

აქციაზე შეკრებილების თქმით, მეფე ერეკლე საამაყოა და ისტორიის დამახინჯება არის ეროვნული დანაშაული.

აქციის მონაწილეებმა გააპროტესტეს „რესპუბლიკური“ პარტიის დამფუძნებლის, ლევან ბერძენიშვილის მოსაზრება, რომელმაც ერთ-ერთ ინტერვიუში ერეკლე მეფეს მოღალატე უწოდა. აქციის მონაწილეები ერეკლე მეორის ძეგლის მიმდებარე ტერიტორიაზე შეიკრიბნენ და ბერძენიშვილს მოუწოდეს, მეფის სახელის შეურაცხყოფისგან თავი შეიკავოს.

შეკრებილებს სიტყვით მიმართა აქციის ერთ-ერთმა მონაწილემ, მსახიობმა პაატა გულიაშვილმა:

"ენა დაიმოკლოს, გაუჭირდება, მაგრამ უნდა დაიმოკლოს, სანამ მეფეს ახსენებს. დიდება მეფეს! და ჭვკიანად იყვნენ სანამ კარგად ვლაპარაკობთ კახელები და თელაველები განსაკუთრებით. ხსოვნა იყოს იმ დიდი მეფის და დავდგეთ ყოველთვის გვერდით, რომ ასეთმა ვიგინდარებმა არ გაბედონ და მეორედ ასეთი სიტყვები არ წარმოთქვან", - თქვა პაატა გულიაშვილმა.

თელავში გამართულ აქციას სხვა რეგიონებიდან ჩასული მოქალაქეებიც შეუერთდნენ.