კრეისერ "მოსკვაზე" დაიღუპა 37, დაშავდა 100-მდე ადამიანი. არიან დაკარგულები - "მედუზა"

რუსეთის ფლოტის აწ უკვე ჩაძირული სარაკეტო კრეისერ "მოსკვას" ეკიპაჟის 37 წევრი დაიღუპა. იტყობინება გამოცემა "მედუზა" რუსეთის შავი ზღვის ფლოტის სარდლობასთან დაახლოებულ წყაროზე დაყრდნობით.

წყაროს ცნობით, დაღუპულთა ცხედრები 15 აპრილს სევეასტოპოლში გადაასვენეს.

მანამდე, "მოსკვას" ეკიპაჟის 40 წევრის დაღუპვის შესახებ იტყობინენებოდა გამოცემა "ნოვაია გაზეტა ევროპა", ეკიპაჟის ერთ-ერთი გადარჩენილი წევრის დედაზე დაყრდნობით.

"მედუზას" წყაროს ცნობით, ეკიპაჟის დაახლოებით 100-მდე წევრი დაიჭრა. არიან დაკარგულებიც, თუმცა მათი ზუსტი რაოდენობა უცნობია.

წყაროს თქმით, კრეისერზე 500-მდე ადამიანი იმყოფებოდა.

რუსეთის თავდაცვის სამინისტროს ეკიპაჟის დაღუპული წევრების თაობაზე განცხადება არ გაუკეთებია. უფრო მეტიც, თავდაცვი უწყება ამტკიცებდა, რომ ეკიპაჟის სრული ევაკუაცია განხორციელდა.

თუმცა ჩაძირული კრეისერის გამოსამშვიდობებელ ცერემონიალზე, რომელიც 15 აპრილს სევასტოპოლში გაიმართა, შენიშნეს სამგლოვიარო ლენტები წარწერით "ხომალდსა და მეზღვაურებს".

მეორე დღეს, რუსეთის თავდაცვის სამინისტრომ გამოაქვეყნა ვიდეო კრეისერის ეკიპაჟის წევრებისა და საზღვაო ძალების მთავარსარდლის, ნიკოლაი ევმონოვის შეხვედრიდან. ჟურნალისტებმა ვიდეოში დაახლოებით 100-მდე მეზღვაური დათვალეს.

რუსეთის თავდაცვის სამინისტრო ამტკიცებს, რომ კრეისერზე "ხანძრის შედეგად საბროლო მასალები აფეთქდა, რის შემდეგაც "ხომალდი ბუქსირების დროს, შტორმის გამო ჩაიძირა".

უკრაინული მხარე ამტკიცებს, რომ გემს ნეპტუნის რაკეტები მოხვდა. "მედუზას" წყარო ადასტურებს უკრაინული მხარის ვერსიას.

რუსეთის თავდაცვის სამინისტრომ, კრეისერის ჩაძირვა 15 აპრილს დაადასტურა.