ფინეთსა და შვედეთს თუ სურვილი ექნებათ, ნატო-ში სწრაფად მივიღებთ - სტოლტენბერგი

ნატო-ს გენერალურმა მდივანმა იენს სტოლტენბერგმა CNN-თან ინტრვიუში განაცხადა, რომ თუ ფინეთი ჩრდილოატლანტიკურ ალიანსში გაერთიანებას მოისურვებს, ნატო ახალ წევრს მიესალმება.

„გადაწყვეტილება ფინეთმა უნდა მიიღოს“, - განაცხადა სტოლტენბერგმა და აღნიშნა, რომ ფინელებს „აქვთ უფლება მომავალი თავად განსაზღვრონ“.

„ეს არის ის, რასაც რუსეთი არ ელოდება. იმიტომ რომ მათ ერთხელ უკვე სცადეს ფინეთის დაშინება, როდესაც უთხრეს, რომ თუ ის {ფინეთი} ნატო-ში გაწევრიანდება, ამას შედეგები მოყვება“, - განაცხადა სტოლტენბერგმა.

თუმცა სტოლტენბერგის თქმით, თუ ფინეთი და შვედეთი გამოთქვამენ გაერთიანების სურვილს, ნატო „იპოვის საშუალებას ეს სწრაფად განახროციელოს“.  

გასულ კვირას ფინეთის პრეზიდენტმა საული ნიინისტემ განაცხადა, რომ სტოლტენბერგთან დეტალურად განიხილა ნატო-ში ახალი სახელმწიფოს მიღების პროცესი.

„აუცილებელია ფინეთის უსაფრთხოების გაძლიერება“, - დაწერა პრეზიდენტმა სოციალურ ქსელში.

ამასთან, ფინეთის პრემიერ-მინისტრმა სანა მარინმა 2 აპრილს განაცხადა, რომ ნებისმიერი გადაწყვეტილება ქვეყნის ნატო-ში გაწევრიანების შესახებ უნდა იქნას მიღებული სწრაფად, მიმდინარე წლის გაზაფხულზე. ამის შესახებ ფინეთის საზოგადოებრივი მაუწყებლის ცნობით, სანა მარინმა სოციალ-დემოკრატიული პარტიის ყრილობაზე განაცხადა.

სანა მარინის განცხადებით, დროა, ფინეთმა სერიოზულად გადახედოს თავის პოზიციას სამხედრო ლოიალობის შესახებ.

მისივე თქმით, უკრაინაში რუსეთის სამხედრო აგრესიამ აიძულა ჰელსინკი, გადაეხედა თავის უსაფრთხოების პოლიტიკისთვის და ეღიარებინა, რომ "რუსეთი არ არის ის მეზობელი, რომელიც ჩვენ გვეგონა".