აზერბაიჯანმა რუსეთის დუმის დეპუტატი საერთაშორისო ძებნაში გამოაცხადა

აზერბაიჯანის გენერალურმა პროკურატურამ რუსეთის სახელმწიფო სათათბიროს დეპუტატი მიხაილ დელიაგინი საერთაშორისო ძებნაში გამოაცხადა.

გენერალური პროკურატურის განცხადებით, დელიაგინის წინააღმდეგ აღძრულია სისხლის სამართლის საქმე აზერბაიჯანის სისხლის სამართლის კოდექსის რამდენიმე მუხლზე დაყრდნობით.

დელიაგინს ბრალად ედება აგრესიული ომის დაწყებისკენ მოწოდებები, ტერორიზმი ცეცხლსასროლი იარაღის გამოყენების მუქარით, სიძულვილის ან მტრობის გაღვივება და ადამიანური ღირსების შელახვა.

აზერბაიჯანის სასამართლოს გადაწყვეტილებით, დელიაგინს აღკვეთის ღონისძიების სახით პატიმრობა შეეფარდა და ინტერპოლის მეშვეობით, საერთაშორისო ძებნაში გამოცხადდა.

გარდა ამისა, აზერბაიჯანულმა მხარემ "მიმართა არაერთი მეგობარი სახელმწიფოს შესაბამის სტრუქტურებს ბრალდებულის დაუყოვნებლივ დაკავების თხოვნით, თუ ის ამ ქვეყნების ტერიტორიაზე მოხვდება".

რუსი დეპუტატის წინააღმდეგ სისხლის სამართლის საქმე მას შემდეგ აღიძრა, რაც მან ფედერალური ტელეარხის "რასია 1-ის" ეთერში, მთიან ყარაბაღში გამწვავებული სიტუაციის ფონზე, რუსეთის არმიის მიერ აზერბაიჯანის ინფრასტრუქტურის გასანადგურებლად ბირთვული ტაქტიკური დარტყმის განხორციელების შესაძლებლობაზე ისაუბრა.

ამასთან, მსგავსი შინაარსის გამოკითხვა მან საკუთარ ტელეგრამის არხზე ჩაატარა.