გარდაიცვალა მადლენ ოლბრაიტი

აშშ-ის პირველი ქალი სახელმწიფო მდივანი მადლენ ოლბრაიტი 84 წლის ასაკში გარდაიცვალა. იტყობინება CNN.

ოლბრაიტი იყო პრეზიდენტ ბილ კლინტონის ადმინისტრაციის ცენტრალური ფიგურა. კლინტონის პრეზიდენტობის პირველი ვადისას, ოლბრაიტი გაეროში აშშ-ის ელჩის თანამდებობას იკავებდა.

შემდეგ, ის შეერთებული შტატების პირველი ქალი სახელმწიფო მდივანი გახდა. ამ თანამდებობას ოლბრაიტი 1997-2001 წლებში იკავებდა.

იგი მხარს უჭერდა ნატოს გაფართოებას, უბიძგებდა ალიანსს ჩარეულიყო ბალკანეთში გენოციდისა და ეთნიკური წმენდის შესაჩერებლად, ცდილობდა შეემცირებინა ბირთვული იარაღის გავრცელება და მხარს უჭერდა ადამიანის უფლებებსა და დემოკრატიას მთელს მსოფლიოში.