მოსკოვის გამზირს კიევის სახელი დაერქვას - "ნაციონალური მოძრაობის" ინიციატივა

საქართველო, თბილისი - 17:46 | 22.02.2022

ნანახია: 537

ერთიანი ნაციონალური მოძრაობა გამოდის ინიციატივით, რომ მოსკოვის გამზირს უკრაინის დედაქალაქის, კიევის სახელი დაერქვას. ამის შესახებ თბილისის საკრებულოში გამართულ ბრიფინგზე, პარტიის სტრატეგიული განვითარების და რეფორმების მდივანმა ანა გოგოლაძემ ისაუბრა.

"სირცხვილია, ერთსა და იმავე ქალაქში, ერთდროულად გვქონდეს 2008 წლის აგვისტოს ომში დაღუპულ გმირების სახელობის ქუჩები და მათთან ერთად არსებობდეს ამ ომის გამომწვევი და განმახორციელებელი ქვეყნის დედაქალაქის სახელობის ქუჩა.

ფრაქცია ერთიანი ნაციონალური მოძრაობა თბილისის საკრებულოში ინიციატივით შევდივართ, არსებულ გამზირს, ნაცვლად ოკუპანტი სახელმწიფოს დედაქალაქის სახელწოდებისა, მიენიჭოს უკრაინის დედაქალაქის, კიევის სახელი, როგორც ჩვენი ქვეყნის ერთგული მეგობრის, საზიარო ღირებულებების მქონე და სტრატეგიული პარტნიორის პატივსაცემად და მხარდასაჭერად", - თქვა ანა გოგოლაძემ.