ბლინკენის განცხადებით, უკრაინაში შეჭრის საბაბად რუსეთს სხვადასხვა პროვოკაციის განხორციელება აქვს განზრახული

შეერთებული შტატების სახელმწიფო მდივანმა ენტონი ბლინკენმა გაეროს უშიშროების საბჭოს სხდომაზე უკრაინის ირგვლივ არსებულ ვითარებასა და რუსეთისგან მომდინარე საფრთხეებზე ისაუბრა.

ენტონი ბლინკენის განცხადებით, უკრაინაში მშვიდობის მისაღწევად კვლავ შენარჩუნებულია მინსკის შეთანხმებების მნიშვნელობა, მაგრამ ახლა მილიონობით უკრაინელი საფრთხის წინაშე დგას.

სახელმწიფო მდივნის თქმით, არსებობს მაღალი რისკის იმისა, რომ რუსეთი უკრაინაში უახლოეს დღეებში შეიჭრას. ამასთან, ბლინკენის განცხადებით, არ არსებობს არავითარი მტკიცებულება იმისა, რომ რუსეთის მტკიცების მიუხედავად, მას გაჰყავს თავისი ძალების უკრაინის მოსაზღვრე რეგიონებიდან.

"150 000-ზე მეტი რუსი ჯარისკაცი კვლავ თავმოყრილია უკრაინის საზღვრებთან", - დასძინა მან.

სახელმწიფო მდივანმა ღრმა შეშფოთება გამოთქვა იმასთან დაკავშირებით, რომ რუსეთი ამზადებს "ცრუ დროშის ოპერაციას", ყალბ საბაბს, რათა გაამართლოს უკრაინაში შეჭრა.

მისი თქმით, ეს შეიძლება იყოს ყალბი, დადგმული ტერორისტული დაბომბვა რუსეთის შიგნით, მასობრივი სამარხების გამოგონილი აღმოჩენა, დრონებით დადგმული შეტევა მშვიდობიანი მოსახლეობაზე, "ყალბი ან თუნდაც რეალური" ქიმიური თავდასხმა, რასაც რუსეთი "ეთნიკურ წმენდად" ან "გენოციდად" შეაფასებს.

ბლინკენის განცხადებით, მოსალოდნელია ასევე მასობრივი კიბერშეტევები უკრაინის ძირითად სახელმწიფო ინსტიტუტებზე.

შეერთებული შტატების სახელმწიფო მდივანმა კიდევ ერთხელ გაიმეროა ვაშინგტონის მზაობა და ერთგულება დიპლომატიის მიმართ. მისი თქმით, დიპლომატიის შანსი ჯერ კიდევ არსებობს. როგორც ბლინკენმა აღნიშნა, სწორედ ამ მიზნით, რუსეთის საგარეო საქმეთა მინისტრ ლავროვს წერილი გაუგზავნა, სადაც მომავალ კვირას ევროპაში შეხვედრას შესთავაზა.

გაეროს უშიშროების საბჭოს სხდომაზე ბლინკენის სიტყვით გამოსვლას წინ უსწრებდა რუსეთის საგარეო საქმეთა მინისტრის მოადგილის სერგეი ვერშინინის გამოსვლა. მისი თქმით, უკრაინას არ სურს მინსკის შეთანხმებების შესრულება.

გაეროში გამართულ სხდომამდე, მედიასთან კომენტარი გააკეთა შეერთებული შტატების პრეზიდენტმა, ჯო ბაიდენმა. მისი თქმით, რუსეთი შეიძლება უკრაინაში უახლოეს დღეებში შეიჭრას