გარდაიცვალა მხატვარი გივი თოიძე

89 წლის ასაკში გარდაიცვალა მხატვარი გივი თოიძე.

გივი თოიძემ 1960 წელს დაამთავრა თბილისის სახელმწიფო სამხატვრო აკადემია და შემდეგ მრავალი წლის განმავლობაში ამავე აკადემიის პროფესორი იყო. მისი ნამუშევრებიდან აღსანიშნავია: „ზამთარი“, სერია მოგზაურობის თემებზე – „მეთევზეები“, „ხევსურეთი“, „მთათუშეთი“, ქალაქური პეიზაჟები – „ძველი თბილისი“ და „ნარიყალა“.

მხატვრის ნამუშევრები დაცულია ისეთ ცნობილ მუზეუმებში, როგორებიცაა: შალვა ამირანაშვილის სახელობის ხელოვნების მუზეუმი, ტრეტიაკოვის გალერეა (რუსეთი), აღმოსავლეთის ქვეყნების ხალხთა მუზეუმი (რუსეთი) და პიტერ ლუდვიგის გალერეა (გერმანია). გივი თოიძის ნახატები ინახება ჯორჯ ბუშის, ჟაკ შირაკისა და სხვა ცნობილ ადამიანთა კერძო კოლექციებში.

გივი თოიძე იყო საქართველოს სახალხო მხატვარი, შოთა რუსთაველის სახელობის სახელმწიფო პრემიის ლაურეატი, თბილისის საპატიო მოქალაქე.

მხატვრის გარდაცვალების გამო მწუხარებას გამოთქვამს საქართველოს კულტურის, სპორტისა და ახალგაზრდობის სამინისტრო.

„საქართველოს კულტურის, სპორტისა და ახალგაზრდობის სამინისტრო პატივს მიაგებს ბატონი გივის დამსახურებას ქართული მხატვრობის განვითარებაში და უსამძიმრებს გარდაცვლილის ოჯახს, მეგობრებსა და კოლეგებს“, – აცხადებენ კულტურის სამინისტროში.