ამ ფორმატში ჩემი ადგილი არ არის - ნინო ბურჯანაძემ სალომე ზურაბიშვილთან მიმდინარე შეხვედრა დატოვა

ერთიანი საქართველოს ლიდერმა, ნინო ბურჯანაძემ პრეზიდენტთან მიმდინარე შეხვედრა დატოვა. "მგონია, რომ ამ ფორმატში ჩემი ადგილი არ არის", - განაცხადა მან ათონელის რეზიდენციიდან გამოსვლის შემდეგ.

ბურჯანაძის თქმით, რაკურსი გადავიდა წარსულის შეფასებაზე, რაც მნიშვნელოვანია, თუმცა ახლა ნომერ პირველი აქტუალობის არ არის.

"მქონდა მოლოდინი, რომ სალომე ზურაბიშვილი ჩაგვაყენებდა საქმის კურსში უკვე ჩატარებული კონსულტაციების თაობაზე. როგორც მინიმუმ თავის მოსაზრებას გვეტყოდა იმასთან დაკავშირებით, თუ რა გზას ხედავს ის კრიზისიდან გამოსასვლელად. წარსულის შეფასება ძალიან მნიშვნელოვანია, მაგრამ ეს არ არის ახლა ნომერ პირველი აქტუალობის. მე არ ვარ ისტორიკოსი, რომელიც დაიწყებს წარსულის კომპეტენტურ შეფასებას. მე ვარ პოლიტიკური პარტიის ლიდერი, მოქმედი პოლიტიკოსი და ბუნებრივია, ნებისმიერ შეფასებასთან დაკავშირებით ჩემი პოლიტიკური ხედვა მექნება," - განმარტა ბურჯანაძემ.

ეროვნული თანხმობის პროცესის ფარგლებში შეხვედრები ათონელის რეზიდენციაში უკვე ორი თვეა გრძელდება. 10 დეკემბერს სალომე ზურაბიშვილმა განაცხადა, რომ წამოიწყებს "ინკლუზიურ პროცესს", საუბარს ეროვნული მასშტაბით, რომელშიც ჩაბმული იქნება მთელი საზოგადოება.