ვინ გახდება ნატო-ს გენერალური მდივანი - DPA სავარაუდო კანდიდატებს ასახელებს

საქართველო, თბილისი - 20:13 | 04.02.2022

ნანახია: 511

გერმანული სააგენტო DPA-ს ინფორმაციით, ჩრდილოატლანტიკური ალიანსის გენერალური მდივნის თანამდებობაზე ყოფილი და მოქმედი მაღალი რანგის პოლიტიკოსები განიხილებიან.

სააგენტოს ინფორმაციით, ნატო-ს მოკავშირეები გენერალური მდივნის პოზიციაზე განიხილავენ:

დიდი ბრიტანეთის ყოფილ პრემიერ-მინისტრ ტერეზა მეის

ნიდერლანდების პრემიერ-მინისტრ მარკ რუტეს

რუმინეთის პრეზიდენტ კლაუს იოჰანისს

ესტონეთის პრემიერ-მინისტრ კაია კალასს

ევროკავშირის ყოფილ უმაღლესი წარმომადგენელს საგარეო საქმეთა და უსაფრთხოების პოლიტიკის საკითხებში ფედერიკა მოგერინის.

მომავალი გენერალური მდივნის არჩევის საკითხი ფართო განსჯის საგანია არამხოლოდ ბრიუსელში, არამედ მოკავშირეთა დედაქალაქებში. ზოგიერთი ოფიციალური პირის, დიპლომატისა თუ ანალიტიკოსის აზრით, დროა, 72 წლის შემდეგ, ალიანსმა თავის უმაღლეს სამოქალაქო თანამდებობაზე პირველი ქალი წარადგინოს.

გამოცემა Politico ჯერ კიდევ გასული წლის ზაფხულში იუწყებოდა, რომ ალიანსის მოკავშირეებმა აქტიურად დაიწყეს კონსულტაციები, თუ ვინ შეცვლის ნატო-ს გენერალურ მდივან იენს სტოლტენბერგს, რომელიც ამ თანამდებობას 2014 წლიდან იკავებს და მისი უფლებამოსილების ვადა 2022 წელს იწურება.

იუწყებიან, რომ სტოლტენბერგის მემკვიდრეს ნატო-ს ლიდერების სამიტზე მადრიდში, სავარაუდოდ, ამ წლის გაზაფხულის ბოლოს ან ზაფხულის დასაწყისში წარადგენენ.

ცოტა ხნის წინ, ცნობილი გახდა, რომ იენს სტოლტენბერგი ნორვეგიის ცენტრალური ბანკის პრეზიდენტად აირჩიეს. მიუხედავად ამისა, ის ნატო-ს გენერალური მდივნის თანამდებობაზე 2022 წლის სექტემბრის ბოლომდე დარჩება.