სამგზავრო აბონიმენტებზე დატანილ ტექსტში შეცდომის გამო ბარათების რეალიზაცია ერთი დღით შეჩერდება, 10 იანვრიდან კი ისევ განახლდება

სამგზავრო აბონიმენტების რეალიზაცია ერთი დღით შეჩერდება, ხოლო 10 იანვრიდან მისი გაყიდვები ისევ განახლდება.

როგორც ცნობილია, საზოგადოებრივ ტრანსპორტში გადახდის სისტემის მართვას საქართველოს ბანკი უზრუნველყოფს, ვადიანი სამგზავრო აბონიმენტების დამზადებას და რეალიზაციას კი საქართველოს ბანკის შვილობილი კომპანია მს+.

"სამწუხაროდ, ხსენებული კომპანიის მიერ დაშვებული იყო მცირედი უზუსტობა. ბარათზე დატანილ ტექსტში კი დაშვებული იყო მექანიკური შეცდომა. სწორედ ამის გამო, დღეს, 9 იანვარს, ერთი დღით, შეჩერდება აბონიმენტების გაცემა.

ბოდიშს გიხდით შექმნილი დისკომფორტისთვის. უკვე ხვალიდან, 10 იანვრიდან კი განახლდება ბარათის სწორი ვერსიის გაცემა.

აქვე გაცნობებთ, რომ ბარათების ბეჭდვას საქართველოს ბანკი საკუთარი სახსრებით უზრუნველყოფს", აღნიშნულია საქართველოს ბანკის მიერ გავრცელებულ ინფორმაციაში.

ცნობისთვის, საზოგადოებრივი ტრანსპორტისთვის განკუთვნილი ახალ ბარათებზე  საბაგიროს ნაცვლად "საბაგარო" წერია.