ნაზარბაევმა ყაზახეთის უშიშროების საბჭოს თავმჯდომარის თანამდებობა დატოვა

ყაზახეთის ყოფილმა პრეზიდენტმა, ნურსულთან ნაზარბაევმა ყაზახეთის უშიშროების საბჭოს თავმჯდომარის თანამდებობა დატოვა. ამის შესახებ ქვეყნის პრეზიდენტმა, ყასიმ ჟომართ-თოყაევმა საგანგებო ტელემიმართვისას განაცხადა.

ამ დროისთვის უცნობია, ნაზარბაევმა უშიშროების საბჭოს თავმჯდომარის თანამდებობა დროებით დატოვა თუ საბოლოოდ.

თოყაევის განცხადებით, ყაზახეთის უშიშროების საბჭოს ამიერიდან თავად ჩაუდგება სათავეში. მისივე განცხადებით, ის აპირებს, რომ წინ აღუდგეს ქვეყანაში არსებულ დაპირისპირებას, "რაც შეიძლება მკაცრად".

ყაზახეთის პრეზიდენტმა სატელევიზიო მიმართვისას განაცხადა, რომ დედაქალაქში რჩება და არსად წასვლას არ გეგმავს.

მისი თქმით, ქვეყნის სხვადასხვა რეგიონში, დემონსტრანტებსა და სამართალდამცველებს შორის შეტაკებებს, რამდენიმე ადამიანი ემსხვერპლა.

შეგახსენებთ, ნურსულთან ნაზარბაევი ყაზახეთს 30 წლის განმავლობაში განაგებდა. 2019 წლის მარტში ნაზარბაევმა თანამდებობიდან გადადგომის შესახებ განაცხადა. გადადგომის მიუხედავად, ნაზარბაევი რჩებოდა უშიშროების საბჭოს ხელმძღვანელად და მმართველი პარტიის თავმჯდომარედ.

ყაზახეთი მასობრივმა საპროტესტო აქციებმა მოიცვა. ყაზახეთის ქალაქებში მასობრივი საპროტესტო აქციები გაზის გაზრდილი ფასის გამო დაიწყო. მასობრივი პროტესტის ფონზე, ყაზახეთის მთავრობა გადადგა.

თავდაპირველად დემონსტრაციები მშვიდობიანი იყო, თუმცა მოგვიანებით შეტაკებებში გადაიზარდა, რის გამოც ყაზახეთის პრეზიდენტმა ცენტრალური აზიის უდიდეს ქალაქ ალმათში და დასავლეთ მანგისტაუს პროვინციაში ორკვირიანი საგანგებო მდგომარეობა გამოაცხადა.

ვითარება განსაკუთრებით გამწვავდა ქალაქ ალმათში, სადაც დემონსტრანტები ადმინისტრაციის შენობაში შეიჭრნენ და გადაწვეს. გარდა ამისა, დემონსტრანტებმა ცეცხლს მისცეს ალმათში მდებარე მმართველი პარტია Nur Otan-ის ერთ-ერთ ოფისი და გენერალური პროკურატურის შენობა.

ცოტა ხნის წინ, პრეზიდენტმა ყასიმ ჟომართ-თოყაევმა დედაქალაქ ნურ-სულთანში საგანგებო მდგომარეობა გამოაცხადა.