ყაზახეთის მთავრობა გადადგა, ქვეყანაში საპროტესტო აქციები მწვავე დაპირისპირებების ფონზე მიმდინარეობს

ყაზახეთში მთავრობა მასობრივი პროტესტის ფონზე გადადგა. ქვეყნის პრეზიდენტმა, ყასიმ-ჟომართ თოყაევმა მთავრობის გადადგომის შესახებ გადაწყვეტილებას ხელი მოაწერა. გამოცემა  „დოიჩე ველეს“ ინფორმაციით, პრემიერ-მინისტრის მოვალეობის დროებით შემსრულებლად ალიხან სმილოვი დაინიშნა. მთავრობის წევრები ახალი მთავრობის ფორმირებამდე მოვალეობის შესრულებას გააგრძელებენ.

ყაზახეთის ქალაქებში მასობრივი საპროტესტო აქციები გაზის გაზრდილი ფასის გამო დაიწყო. თავდაპირველად დემონსტრაციები მშვიდობიანი იყო, თუმცა მოგვიანებით შეტაკებებში გადაიზარდა, რის გამოც ყაზახეთის პრეზიდენტმა, ყასიმ-ჟომართ თოყაევმა ცენტრალური აზიის უდიდეს ქალაქ ალმათში და დასავლეთ მანგისტაუს პროვინციაში ორკვირიანი საგანგებო მდგომარეობა გამოაცხადა.

ამ მომენტისთვის სამართალდამცველებსა და მომიტინგეებს შორის შეტაკებები მიმდინარეობს ალმათის ცენტრში. სხვადასხვა ინფორმაციით, აქციის მოანწილეთა რაოდენობა ამ დროისათვის 3 ათასს აჭარბებს. ძალოვანები დემონსტრანტების წინააღმდეგ სპეცსაშუალებებს იყენებენ, მათ შორის ხმოვან ყუმბარებს. გავრცელებული ინფორმაციით, აქციის მონაწილეებმა ქალაქის მერიის შენობაში შეჭრა სცადეს. ყაზახეთის შსს-ს ოფიციალური ცნობით, ამ დროისთვის დაკავებულია 200-ზე მეტი დემონსტრანტი.