კორონავირუსის ახალი, "ომიკრონი" შტამის გავრცელების გამო მზარდი შეშფოთების ფონზე, ჯანმრთელობის მსოფლიო ორგანიზაცია გამოდის მოწოდებით, საზოგადოებრივი ჯანმრთელობის დასაცავად, გაუქმდეს სადღესასწაულო ღონისძიებები.

"გაუქმებული სადღესასწაულო ღონისძიება უკეთესია, ვიდრე შეწყვეტილი სიცოცხლე", - აცხადებს ჯანმრთელობის მსოფლიო ორგანიზაციის გენერალური დირექტორი.

ტედროს ადანომ ღებრეიესუსის განცხადებით, ახლა უკვე არსებობს მტკიცებულება, რომ "ომიკრონი" ვარიანტი "საგრძნობლად უფრო სწრაფად ვრცელდება", ვიდრე წინა დომინანტური შტამი, "დელტა".

"ყველა ჩვენგანი დაიღალა ამ პანდემიით. ყველას გვსურს დროის გატარება მეგობრებთან და ოჯახთან ერთად. ყველას გვსურს ნორმალური ცხოვრების დაბრუნება, თუმცა ყველას, ლიდერებსა და ინდივიდუალურ პირებს, რთული გადაწყვეტილებების მიღება მოგვიწევს ხალხის დასაცავად, მათ შორის სადღესასწაულო ღონისძიებების გაუქმებით ან გადადებით. სჯობს ახლა გავაუქმოთ და მოგვიანებით ვიზეიმოთ, ვიდრე ახლა ვიზეიმოთ და მოგვიანებით ვიგლოვოთ", - განაცხადა ღებრეიესუსმა.

"ომიკრონი" შტამი, რომელიც თავდაპირველად სამხრეთ აფრიკის რეგიონში გამოავლინეს, ახლა უკვე მსოფლიოს 90-ზე მეტ ქვეყანაშია გავრცელებული. აშშ-ში "ომიკრონი" უკვე იქცა კორონავირუსის დომინანტურ სახეობად. 18 დეკემბრის მონაცემებით, აშშ-ში კორონავირუსით ინფიცირების შემთხვევების 73 პროცენტი "ომიკრონ" ვარიანტზე მოდის.

საქართველოში "ომიკრონით" ინფიცირების 2 შემთხვევა 20 დეკემბერს დადასტურდა.