"ომიკრონი" საქართველოში ალბათ უახლოეს ერთ თვეში დაიწყებს ცირკულაციას - პაატა იმნაძე

უახლოესი ერთი თვე ალბათ იქნება ის პერიოდი, როდესაც საქართველოში ეს ვირუსი დაიწყებს ცირკულაციას, - განაცხადა დაავადებათა კონტროლის ეროვნული ცენტრის დირექტორის მოადგილემ პაატა იმნაძემ კორონავირუსის ახალი შტამის "ომიკრონის" გავრცელების შესახებ საუბრისას.

მისი თქმით, იყო რამდენიმე საეჭვო შემთხვევა, თუმცა "ომიკორნის" არსებობა საქართველოში ჯერ არ დადსტურებულა.

"საქართველო დედამიწაზეა და შესაბამისად, რაც დედამიწაზეა, საქართველოში ადრე თუ გვიან იქნება. უახლოესი ერთი თვე ალბათ იქნება ის პერიოდი, როდესაც საქართველოში ეს ვირუსი დაიწყებს ცირკულაციას. მანამდე ჩვენ რა თქმა უნდა, კვირაში დაახლოებით 100-მდე ვირუსის სეკვენირება ხდება, ყოველდღიურ რეჟიმში, მუდმივადაა მეთვალყურეობა, როდის გამოჩნდება ომიკრონი ქვეყანაში. ჯერჯერობით არ გამოჩენილა. იყო რამდენიმე საეჭვო შემთხვევა, რა თქმა უნდა, გამოკვლეულია ეს ყველა. ვნახოთ, ბოლო-ბოლო, რა თქმა უნდა, ომიკრონი გამოჩნდება", - თქვა იმნაძემ.

"ომიკრონ" შტამი პირველად სამხრეთ აფრკაში გავრცელდა. ამ დროისათვის ის მსოფლიოს 63 ქვეყანაშია უკვე გამოვლენილი. კორონავირუსის ეს ვარიანტი ყველა ადრე გამოვლენილ შტამებთან შედარებით, სწრაფად ვრცელდება.