გავრცელებულ ვიდეოკადრებში ასახული ქმედებები თავისუფლად შეგვიძლია წამებად შევაფასოთ - უკრაინის სახალხო დამცველი სააკაშვილის მოსანახულებლად ნებართვას ელოდება

საქართველო, თბილისი - 14:00 | 15.11.2021

ნანახია: 496

უკრაინის სახალხო დამცველი ლუდმილა დენისოვა, რომელიც ცოტა ხნის წინ, საქართველოს ეწვია, მიხეილ სააკაშვილის მოსანახულებლად იუსტიციის სამინისტროს ნებართვას ელოდება.

დენისოვას განცხადებით, პენიტენციურ დაწესებულებაში შესვლისთვის საჭირო ყველა დოკუმენტაცია სამინისტროში უკვე წარადგინა.

უკრაინელი ომბუდსმენის თქმით, მნიშვნელოვანია, რომ მიხეილ სააკაშვილი სამოქალაქო კლინიკაში გადაიყვანონ.

"მიხეილ სააკაშვილის შესახებ მიღებულ ნებისმიერ ინფორმაციას უკრაინის პრეზიდენტის ადმინისტრაციას, ადამიანის უფლებები დამცველ და საერთაშორისო ორგანიზაციებს მყისიერად ვუგზავნით. იმედი მაქვს რომ დღეს ევროპის საბჭოს ადამიანის უფლებათა კომისართან მოლაპარაკებებს გამართვას შევძლებ. მიხეილ სააკაშვილის ადვოკატებისაგან და ექიმებისგან მისი ჯანმრთელობის შესახებ დეტალური ინფორმაცია უნდა მივიღო. ძალიან ვნერვიულობთ რომ უკრაინის მოქალაქე ამ მდგომარეობაში იმყოფება. დღეს შიმშილობის 46-ე დღეა და მნიშვნელოვანია რომ მიხეილ სააკაშვილი შესაფერის, მრავალპროფილურ სამოქალაქო კლინიკაში გადაიყვანონ. გავრცელებულ ვიდეო კადრებში ასახული ქმედებები თავისუფლად შეგვიძლია წამებად შევაფასოთ. უკრაინის პრეზიდენტის პოზიცია უცვლელია და მიხეილ სააკაშვილის უფლებების დაცვასა და მის შესაბამის სამედიცინო დაწესებულებაში გადაყვანას მოითხოვს", - ამბობს ლუდმილა დენისოვა, რომლის თარგმანსაც "მთავარი არხი" ავრცელებს.