დეკანოზი გიორგი მამალაძე სამოქალაქო კლინიკა ვივამედში გადაიყვანეს

დეკანოზი გიორგი მამალაძე ციხის საავადმყოფოდან, სამოქალაქო კლინიკა ვივამედში გადაიყვანეს. ინფორმაციას დეკანოზის ძმა თორნიკე მამალაძე ადასტურებს.

თორნიკე მამალაძის ინფორმაციით, მისი ძმა 3 წელია გლდანის ციხის საავადმყოფოში იმყოფება, თუმცა ადეკვატურ მკურნალობას ვერ იღებს. მისივე თქმით, დეკანოზი უფრო ცუდადაც ყოფილა და ის მოთხოვნის მიუხედავად კლინიკაში არ გადაუყვანიათ​.

"სამი წელია მე-18 დაწესებულებაში იმყოფება და ეს დაწესებულება პირდაპირი მნიშვნელობით არის სასაკლაო. 3 წლის განმავლობაში პარალიზებულ მდგომარეობაშია და არანაირი მკურნალობა არ ჩატარებულა, რადგან რესურსი არ გააჩნია ამ საავადმყოფოს. მითხრეს, რომ გადმოყვანილია "ვივა მედში", მაგრამ გადმოყვანის მიზეზი უცნობია. თუ ეს არის თემების გადაფარვის მცდელობა, ჩემი ძმა ამ ბინძურ საქმეში არ აჰყვება მათ",- ამბობს თორნიკე მამალაძე.