ეს არ არის შესაბამისი დაწესებულება ყოფილი პრეზიდენტისთვის, შემაშფოთებელია, როგორ ეპყრობიან მას - სააკაშვილის ამერიკელი ადვოკატი

ამერიკელმა ადვოკატმა, ჯონ სენდვიჯმა მიხეილ სააკაშვილი გლდანის ციხის საავადმყოფოში მოინახულა.

შეხვედრის დასრულების შემდეგ მან ჟურნალისტებს განუცხადა, რომ ციხის საავადმყოფო არ არის შესაბამისი დაწესებულება და იქ ექსპრეზიდენტის უსაფრთხოების საკითხი სერიოზულად შემაშფოთებელია.

მისი თქმით, ექსპრეზიდენტი თავს მხნედ გრძნობს.

მიხეილ სააკაშვილის მიმართ არსებულ საქმეებზე საუბრისას, ჯონ სენდვიჯმა თქვა, რომ მსგავსი ბრალდებები არასდროს მოიაზრება სისხლის სამართლის საქმედ არც აშშ-სა და არც საერთაშორისო სამართლის პრაქტიკაში, თუმცა, მისი თქმით, ახლა მთავარი სააკაშვილის ჯანმრთელობის მდგომარეობაა.

"მე ვნახე ბრალდებები და შემიძლია ვთქვა, რომ ამერიკაში მსგავს ბრალდებებს ვერ იხილავთ. ვფიქრობ, ის, რაც მას ბრალად ედება, საერთოდ არ იქნებოდა მიჩნეული სისხლის სამართლის დანაშაულად ამერიკის კანონით, ან საერთაშორისო სამართლის მიხედვით. თუმცა, ამჟამად ჩვენი უპირველესი საფიქრალი მისი ჯანმრთელობა და უსაფრთხოებაა, - განაცხადა ადვოკატმა. 

მისი თქმით, სახელმწიფოს აქვს დაკავებულის მიმართ ზრუნვის ვალდებულება, რაც აღნიშნულ დაწესებულებაში ბერ შესრულდება.

"ეს არ არის დაწესებულება, სადაც მიხეილ სააკაშვილი უსაფრთხოდ იქნება. არ ვარ ქართული სამართლის სპეციალისტი, თუმცა, საერთაშორისო სამართლის მიხედვით, სახელმწიფოს აქვს დაკავებულის მიმართ ზრუნვის ვალდებულება, რაც ამ დაწესებულებაში ადეკვატურად ვერ შესრულდება". - ამბობს ადვოკატი.

ჯონ სენდვიჯი გამოეხმაურა 11 ნოემბერს პენიტენციური სამსახურის მიერ გავრცლებულ ვიდეომასალასაც.

"ვნახე იუსტიციის სამინისტროს მიერ გამოქვეყნებული კადრები და მინდა ვთქვა, რომ ნამდვილად შემაშფოთებელია ის, თუ როგორ ეპყრობიან ყოფილ პრეზიდენტს. თუმცა, კიდევ ერთხელ ვიმეორებ, რომ ყველაზე მთავარი ამ დაწესებულების შეუსაბამობაა. ეს არ არის საავადმყოფო, ეს არის საპატიმრო, სადაც არის სამედიცინო პუნქტი, თუმცა ის არ არის საკმარისად აღჭურვილი, რომ სიტუაციის დამძიმების შემთხვევაში პაციენტს ადეკვატური დახმარება აღმოუჩინონ", - თქვა ჯონ სენდვიჯმა.