ალეკ ბოლდუინმა გადასაღებ მოედანზე მომხდარი ტრაგედიის შემდეგ პირველი კომენტარი გააკეთა

ამერიკელმა მსახიობმა ალეკ ბოლდუინმა გადასაღებ მოედანზე მომხდარი ტრაგედიის შემდეგ, ჟურნალისტებთან პირველი კომენტარი გააკეთა.

მსახიობი ვერმონტის შტატში, საავტომობილო გზაზე მანქანით გაადგილდებოდა, როდესაც მას რეპორტიორები აედევნენ. იუწყება ტელეარხი CNN.  ბოლდუინი იძულებული გახდა ავტომობილი გაეჩერებინა და ჟურნალისტებს გასაუბრებოდა.

„ინციდენტები გადასაღებ მოედანზე ხდება, მაგრამ არა ასეთი. ეს ეპიზოდი ტრილიონი შემთხვევიდან ერთ-ერთია“, - თქვა ბოლდუინმა.

მან აღნიშნა, რომ მისთვის აკრძალულია კომენტარის გაკეთება გამოძიების დასრულებამდე, რომელიც არკვევს, როგორ მოხვდა რევოლვერში საბძოლო ტყვიები.

რაც შეეხება ფილმის გადაღებებს, ბოლდუინმა თქვა, რომ გადაღებები, სავარაუოდ, აღარ გაგრძელდება.

„ის ჩემი მეგობარი იყო (ოპერატორი), იმ დღეს, როდესაც სანტა-ფეში გადაღებებზე ჩავედი, ის ჩვენს რეჟისორთან, ჯოელთან ერთად ვახშამზე დავპატიჟე. ჩვენ ძალიან კარგი გუნდი ვიყავით, ერთად ვიღებდით ფილმს, შემდეგ კი ეს საშინელი ამბავი მოხდა“, - თქვა ბოლდუინმა.

საუბრის დასასრულს მსახიობმა ჟურნალისტებს სთხოვა, შეწყვიტონ მისი დევნა, რადგან ავტომობილში, რომელსაც ისინი მისდევენ, ატირებული ბავშვები არიან.

ფილმის გადასაღებ მოედანზე ტრაგედია 21 ოქტომბერს მოხდა. ბოლდუინმა, რომელიც მთავარ როლს ასრულებდა, იარაღიდან გაისროლა, რომელიც ფუჭის ნაცვლად, საბრძოლო ტყვიებით დატენილი აღმოჩნდა. ინციდენტის შედეგად დაიღუპა კინოოპერატორი ჰალინა ჰატჩინსი, რეჟისორი ჯოელ სოუზა კი დაიჭრა.