ირანთან სავიზო რეჟიმის გაუქმების შემდეგ ქვეყანა უფრო მეტი ირანელი ტურისტის მოლოდინშია

ბოლო წლებში საქართველოში ირანელი ტურისტების რაოდენობის კლება აღინიშნებოდა, თუმცა ირანთან სავიზო რეჟიმის გაუქმების შემდეგ ქვეყანა უფრო მეტი ირანელი ტურისტის მოლოდინშია.

როგორც ცნობილია, ქართული მხარის ინიციატივით, სატელეფონო საუბარი შედგა საქართველოს პრემიერ-მინისტრსა და ირანის ისლამური რესპუბლიკის პრეზიდენტს შორის. გიორგი კვირიკაშვილმა და ჰასან რუჰანიმ ისაუბრეს ქართველი და ირანელი ხალხის მჭიდრო კულტურულ ურთიერთობებზე.

საუბრისას გამოითქვა ტურიზმის სფეროში თანამშრომლობის გაღრმავების იმედი. აღინიშნა, რომ ამ მიმართულებით ქართული მხარე გადადგამს კონკრეტულ ნაბიჯს, რაც ირანთან სავიზო რეჟიმის გაუქმებაში გამოიხატება.

ტურიზმის ეროვნული ადმინისტრაციის ინფორმაციით, 2015 წელს საქართველოში 25 ათას 264 ირანელი მოგზაური დაფიქსირდა. 2014 წელს კი - 47 ათას 929 ირანელი მოგზაური, რაც იმას ნიშნავს, რომ 2015 წელს 2014 წელთან შედარებით ირანელ მოგზაურთა რაოდენობა 47 %-ით შემცირდა.

სტატისტიკური ინფორმაციის მიხედვით, 2013 წელს საქართველომ 85 ათას 598 ირანელ ტურისტს უმასპინძლა, ანუ 2014 წელს 2013 წელთან შედარებით საქართველოში ირანელ ტურისტთა რაოდენობა 44 %-ით შემცირდა. ~

2012 წელს საქართველოში 89 ათას 697 ირანელი მოგზაური იმყოფებოდა. ანუ 2013 წელს 2012 წელთან შედარებით მაჩვენებლები 5 %-ით შემცირდა. ბოლო 5 წლის სტატისტუიკურ მაჩვენებლებს თუ გადავხედავთ, სახეზეა, რომ საქართველომ ყველაზე მეტ ირანელ ტურისტს 2012 წელს უმასპინძლა.

უნდა აღინიშნოს, რომ ირანიდან ტურისტების კლება მას შემდეგ დაფიქსირდა, რაც საქართველომ 2013 წელის სექტემბერში ირანთან სავიზო რეჟიმი გაამკაცრა.

2010 წელს საქართველომ ირანიდან 21 ათას 313 ტურისტი, ხოლო 2011 წელს კი 60 ათას 191 ტურისტი მიიღო. საანგარიშო პერიოდში ზრდამ 182 %-ი შეადგინა.

მიმდინარე ეტაპისთვის საქართველოში ირანელი ტურისტების რაოდენობა 26 %-ითაა გაზრდილი. ტურიზმის ეროვნულ ადმინისტრაციაში აცხადებენ, რომ 2016 წლის იანვარში საქართველომ 1 ათას 129 ირანელ მოგზაურს უმასპინძლა, 2015 წლის იანვარში კი - 894 მოგზაურს, შესაბამისად ზრდამ 26 %-ი შეადგინა.