მთელ მსოფლიოში მილიონობით ადამიანი შიმშილობს. სააკაშვილის შიმშილობა, აი ძალიან ნაკლებად მაინტერესებს - ნათია თურნავა

საქართველოს ეკონომიკისა და მდგარდი განვითარების მინისტრის, ნათია თურნავას განცხადებით, "ნაკლებად აინტერესებს" საქართველოს მესამე პრეზიდენტის მიხეილ სააკაშვილის საპატიმროში შიმშილობის საკითხი.

მისი თქმით, მთელ მსოფლიოში მილიონობით ადამიანი შიმშილობს სიღარიბის გამო.

"ის იხდის სასჯელს, რომელიც დაკისრებული აქვს კანონით. რაც შეეხება იმას, შიმშილობს თუ არ შიმშილობს მე, არ მიწყინოთ, მაგრამ არაადეკვატური კითხვაა ეკონომიკის მინისტრის მიმართ. მთელ მსოფლიოში მილიონობით ადამიანი შიმშილობს სიღარიბის გამო, საქართველოშიც, ჯერ სამწუხაროდ, სიღარიბის პრობლემა გვაქვს. თქვენ რომ მეკითხებოდეთ, ეკონომიკის მინისტრს, რას ვაკეთებთ იმისთვის და ბერვ რამეს ვაკეთებთ, რომ შიმშილის პრობლემა ბოლომდე აღმოიფხვრას საქართველოში და არავის უჭირდეს კვება, სიღარიბეს ვებრძოლოთ, მაშინ იქნებოდა სწორი კითხვა ჩემთან. მაგრამ, ეს კონკრეტულად საერთოდ არ მაინტერესებს, მინდა გითხრათ, აი ძალიან ნაკლებად მაინტერესებს", - თქვა ნათია თურნავამ.

საქართველოს მესამე პრეზიდენტი მიხეილ სააკაშვილი თბილისში 1-ელ ოქტომბერს დააკავეს. ის რუსთავის მე-12 პენიტენციურ დაწესებულებაში იმყოფება. პატიმრობის პირველივე დღიდან სააკაშვილმა შიმშილობა გამოაცხადა.