უკრაინის რადამ დმიტრი რაზუმკოვი სპიკერის თანამდებობიდან გაათავისუფლა

უკრაინის უმაღლესმა რადამ პარლამენტის თავმჯდომარე დმიტრი რაზუმკოვი თანამდებობიდან გაათავისუფლა.

შესაბამის გადაწყვეტილებას მხარი 284-მა დეპუტატმა დაუჭირა.

რაზუმკოვი 2019 წლის ნოემბრიდან ხელმძღვანელობდა პარტია „ხალხის მსახურს“. უკრაინის პარლამენტის სპიკერის თანამდებობა მან 2019 წლის 29 აგვისტოს დაიკავა.

30 სექტემბერს, ფრაქცია „ხალხის მსახურის“ თავმჯდომარემ დავით არახამიამ სადეპუტატო ფრაქციის სახელით მოამზადა წერილი რაზუმკოვის სპიკერის პოსტიდან გათავისუფლების შესახებ.

უკრაინული მედია რაზუმკოვის გათავისუფლების მიზეზად მასსა და პრეზიდენტის ოფისს შორის უთანხმოებას ასახელებს.

უკრაინის პრეზიდენტმა ვოლოდიმირ ზელენსკიმ ტრუსკავეცში გამართულ პრესკონფერენციაზე განაცხადა, რომ პარტია „ხალხის მსახურს“ აქვს „მილიონობით შეკითხვა უმაღლესი რადას თავმჯდომარის მისამართით“. „ჩვენ, ყველას გვესმის, რომ ის არ არის ამ გუნდის წევრი და ამის შესახებ ის (რაზუმკოვი) საკმაოდ ღიად ლაპარაკობს“, - აღნიშნა უკრაინის პრზეზიდენტმა.

უმაღლესი რადას თავმჯდომარის თანამდებობაზე წარდგენილია ხუთი კანდიდატურა, მათ შორის ვოლოდიმირ ზელენსკის პარტიამ „ხალხის მსახურმა“ აღნიშნულ პოსტზე რუსლან სტეფანჩუკი წარადგინა.