ასაცრელად თავისი ნებით კიდევ შეიძლება 150- 200 ათასი ადამიანი მოვიდეს, მეტი არა - ამირან გამყრელიძე

დაავადებათა კონტროლის ეროვნული ცენტრის ხელმძღვანელის, ამირან გამყრელიძის განაცხადებით, ასაცრელად თავისი ნებით კიდევ  დაახლოებით,150, მაქსიმუმ 200 ათასი ადამიანი მივა.

მისივე თქმით, დაავადებათა კონტროლის ცენტრმა წარადგინა პაკეტი, რომელიც, როგორც არაპირდაპირი, ასევე პირდაპირი მექანიზმებით გააქტიურებს აცრებს. გამყრელიძის აზრით, მასწავლებლებისა და ექიმებისთვის აცრა სავალდებულო უნდა გახდეს.

„დაავადებათა კონტროლის ცენტრმა დღესაც საკოორდინაციო საბჭოზე წარადგინა რეკომენდაციების პაკეტი, რომელიც ეხება აცრების ინტენსიფიცირებას, როგორც პირდაპირი, ისე არაპირდაპირი მანდატორული მექანიზმებით. არსებობს პირდაპირი, როდესაც კანონით ავალებ და არსებობს ასევე არაპირდაპირი მექანიზმი, რომელიც აპრობირებულია ბევრ ქვეყანაში. იმედია, რომ ჩვენთანაც იქნება ეს გადაწყვეტილებები მიღებული. დაახლოებით მილიონამდე ადამიანი გვყავს ახლა აცრილი, 760 ათასამდე არის ორჯერ აცრილი. ჩავთვალოთ, რომ მილიონი ადამიანი აცრილია ერთჯრედად. რესურსი იმისა, რომ უფრო გაძლიერებული საინფორმაციო კამპანიით კიდევ მოვიდნენ ადამიანები ასაცრელად თავისი ნებით, როგორც აქამდე მოდიოდნენ, არის დაახლოებით, ჩვენი გათვლებით, 150, მაქსიმუმ 200 ათასი ადამიანი, მეტი არა. ჩვენ წარვადგინეთ პაკეტი. ჩემი გადასახედიდან, ექიმებისა და მასწავლებლებისთვის მანდატორიზმს ვუჭერ მხარს ამ ორი ჯგუფისთვის. მომავალი კვირების განმავლობაში ვფიქრობ, ამაზე გადაწყვეტილებები უნდა იყოს“, – განაცხადა გამყრელიძემ.