იტალიაში ვაქცინაცია, შესაძლოა, სავალდებულო გახდეს

იტალიის ჯანდაცვის მინისტრ რობერტო სპერანცას განცხადებით, ქვეყანაში კორონავირუსის საწინააღმდეგო ვაქცინაცია, შესაძლოა, სავალდებულო გახდეს. მან აღნიშნა, რომ იტალია პირევლი ქვეყანა იყო, რომელმაც სამედიცინო სფეროს თანამშრომლებისთვის ვაქცინაცია სავალდებულო გახადა, რის შემდეგაც მის მაგალითს ბევრმა ქვეყანამ მიბაძა.

როგორც სპერანცამ გაზეთ Corriere della Sera-თან ინტერვიუში აღნიშნა, იმ პირობებში, როდესაც ინფიცირება გრძელდება, აუცილებელია ან ვაქცინაციის კამპანიის გაძლიერება, ან გარკვეული ზომების შემოღება. მისი თქმით, იტალიას არ ეშინია სავალდებულო ვაქცინაციის.

„თუ ჯანმრთელობის დაცვის უფლება და თავისუფლების ახალი შეზღუდვების თავიდან არიდების აუცილებლობა ამ გადაწყვეტილებამდე მიგვიყვანს, არ შევშინდებით და არ გავჩერდებით“, - თქვა მინისტრმა.

იტალიაში ვაქცინაცია ნებაყოფლობითია. ერთადერთ გამონაკლისს მედიკოსები წარმოადგენენ, რომლებიც მთავრობის დეკრეტის თანახამდ, ვალდებულნი არიან ვაქცინა გაიკეთონ. ასევე სექტემბრიდან სავალდებულო გახდა სერთიფიკატი green pass-ი უნივერსიტეტებისა და სკოლების თანამშრომლებისათვის, რომლებიც საშვს მხოლოდ ვაქცინაციის შემდეგ მიიღებენ.

ორი დღის წინ პრემიერმა მარიო დრაგიმ არ გამორიცხა სავალდებული ვაქცინაციისა და green pass-ის მოქმედების გაფართოვება.

გაზაფხულზე იტალიის ხელისუფლებამ მიზნად დაისახა მოსახლეობის 80 პროცენტის ვაქცინაცია და სექტემბრის ბოლოსთვის კოლექტიური იმუნიტეტის მიღწევა. იტალიის ჯანდაცვის სამინისტროს თანახმად, ქვეყანაში სრულად ვაქცინირებულია 12 წელს ზევით მოსახლეობის 71 პროცენტი.