მთავრობა ვაქცინაციის წახალისებისთვის ლატარიის ჩატარებას გეგმავს - გამყრელიძე

მთავრობა ვაქცინაციის წახალისებისთვის ლატარიის ჩატარებას გეგმავს, - ამის შესახებ დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტომა, ამირან გამყრელიძემ ჟურნალისტებისთვის გამართულ ვებინარზე განაცხადა.

როგორც ამირან გამყრელიძემ თქვა, ფინანსთა სამინისტროსთან უკვე იყო საუბარი წამახალისებელ ლატარიასთან დაკავშირებით და უწყება, სავარაუდოდ, 1-ელ ან 2 სექტემბერს გათამაშების პირობებს გაასაჯაროვებს.

გამყრელიძის თქმით, წამახალისებელი გათამაშება ითვალისწინებს "სერიოზული ფულადი ჯილდოს" გაცემას.

"წახალისებას და ლატარიას რაც შეეხება, წინა საბჭოზე განხილული იყო ეს საკითხი. ფინანსთა სამინისტრო გააკეთებს პირველ სექტემბერს განცხადებას, თუ როდიდან დაიწყება ეს ე.წ. პერმანენტული ლატარიის გათამაშება, რათა წახალისებული იყოს გარკვეული ფულადი ჯილდოებით. უკვე შედგენილია სქემა და ყველაფერი. ჩვენს ბაზებთან ექნება ლატარიას კავშირი, რათა იდენტიფიცირებული იყოს ერთხელ ან ორჯერ აცრილი ადამიანი და მოხდება გათამაშებები.

სექტემბრის დასაწყისში ოფიციალურ განცხადებას გააკეთებს ფინანსთა სამინისტრო, რომელიც აქტიურად მუშაობს ლატარიის კომპანიასთან", - თქვა გამყრელიძემ.