„მე, ვიხდი ბოდიშს“ - თოფაძის ნაცვლად წულუკიანი იხდის ბოდიშს

იუსტიციის მინისტრმა თეა წულუკიანმა დაუნის სინდრომის მქონე ბავშვების მშობლებს ბოდიში მოუხადა.

„არ მგონია, რომ ბოდიშის მოხდა იყოს პრობლემა. დაუნის სინდრომის მქონე ბავშვების მშობლებს მე, პირადად ვუხდი ბოდიშს და ბავშვის უფლება, რომელიც თანასწორია კანონის წინაშე, უნდა იყოს დაცული. ჩვენ ის სამინისტრო ვართ და ის მთავრობა ვართ, რომელიც ბავშვთა უფლებებზე ვმუშაობთ. ამიტომ, რა თქმა უნდა, ასეთი განცხადებები არის ცალსახად მიუღებელი“, - განაცხადა წულუკიანმა.

მისი თქმით, „ქართული ოცნება - მრეწველების“ ლიდერის გოგი თოფაძის განცხადება გაუაზრებელი იყო და ის ყველანაირ ჩარჩოს სცდება.

შეგახსენებთ, რომ ფრაქცია „მრეწველების“ ლიდერმა, გოგი თოფაძემ საქართველოს პრეზიდენტი გიორგი მარგველაშვილი გააკრიტიკა და აცხადებს, რომ პრეზიდენტმა ქართველი ხალხი დაუნებს შეადარა.

„თქვენ ხართ პირველი კაცი საქართველოში. თქვენი ყველა წინადადება, სიტყვა ანალიზდება და მინდა მოგახსენოთ თქვენი გამოანთქვამები ქართველ ხალხზე, ქართველ ერზე.  ქართველი ხალხი თქვენ დაუნებს შეადარეთ, ძალიან სამწუხაროა, თუ თქვენ ასე აფასებთ საქართველოს მოსახლეობას, მაშინ არც პრეზიდენტობა უნდა გეკადრათ საქართველოში“, - განაცხადა გოგი თოფაძემ საგაზაფხულო სესიაზე, სადაც გიორგი მარგველაშვილი ყოველწლიური მოხსენებით წარსდგა.