"გთხოვთ, დაუშვათ გამონაკლისი" - 13 წლის მოზარდი ქართველ პედიატრს ფაიზერით აცრას სთხოვს

ექიმ-პედიატრს თემურ მიქელაძეს 13 წლის მოზარდი გამონაკლისის დაშვებას და ფაიზერით ვაქცინით აცრას სთხოვს.ამის შესახებ ექიმი ფეისბუქში წერს.

"გამარჯობათ, ბატონო თემურ, მე ვარ ბავშვი, რომელიც აქტიურადაა ჩართული კოვივაქცინაციის მხარდაჭერის პროპაგანდაში, ინფორმირებაში და მოსახლეობის დარეგისტრირებაში.

დედა მყავს ინსულტგადატანილი, ვაქცინირებულიც სინოფარმის 1 დოზით, მაგრამ მეშინია, რამე არ მივიტანო სახლში, გთხოვთ, იქნებ დაუშვათ გამონაკლისი და იმ თქვენს მიერ ფაიზერით ვაქცინირებული მოზარდივით მეც ავიცრები, ესეც გახდება ერთერთი რეკლამა საზოგადოებისთვის...თქვენი დიდი იმედი მაქვს, პატივისცემით, მადლობა" - ნათქვამია მესიჯში, რომელიც თემურ მიქელაძემ Facebook-ზე გამოაქვეყნა.

23 ივლისს, თემურ მიქელაძემ რუსთავი 2-ის ეთერში თქვა, რომ მისი პაციენტი, 12 წლის ბავშვი, რომელსაც განსაკუთრებული ჩვენება ჰქონდა, გამონაკლისის სახით უკვე აცრეს ფაიზერის ვაქცინით.