გახარიას მხრიდან არაეთიკურია, პოლიციელების მიმართ პრეტენზიების წაყენება - პაპუაშვილი

გიორგი გახარიას მხრიდან არაეთიკურია, როცა პოლიციელების მიმართ პრეტენზიებს აყენებს. ყოფილი შს მინისტრის მხრიდან ასეთი დამოკიდებულება მიუღებელია, - ამის შესახებ პარლამენტის განათლების კომიტეტის თავმჯდომარე შალვა პაპუაშვილმა 5-6 ივლისის მოვლენებზე გიორგი გახარიას განცხადებების შეფასებისას აღნიშნა.

მისი თქმით, გახარიამ, როგორც შინაგან საქმეთა ყოფილმა მინისტრმა და ყოფილმა პრემიერმა, ამ პასუხისმგებლობიდან გამომდინარე უნდა ისაუბროს და არ შეეცადოს, რომ ახლა პოპულიზმით იყოს დაკავებული.

„მან ყველაზე კარგად იცის, რა გამოწვევების წინაშე იდგა შინაგან საქმეთა სამინისტრო და მისი მხრიდან არაეთიკურია, როცა პოლიციელების მიმართ პრეტენზიებს აყენებს. ყოფილი შს მინისტრის მხრიდან ასეთი დამოკიდებულება მიუღებელია“, – განაცხადა შალვა პაპუაშვილმა.

გახარიამ განაცხადა, რომ სახელმწიფომ ვერ შეასრულა მისი ძირითადი ფუნქცია და ვერ დაიცვა ჟურნალისტები. მისივე თქმით, შინაგან საქმეთა სამინისტროს ნათქვამ სიტყვებს ნდობა და ფასი აღარ აქვს და იძულებულია, დაარღვიოსკანონი და ლექსო ლაშქარავას საქმეზე ინფორმაცია   საზოგადოებას ნაწილ-ნაწილ შესთავაზოს.