თქვენ გარდააცვალეთ ლექსო ლაშქარავა, თქვენზეა პასუხისმგებლობა - მეუფე ანტონი ჟურნალისტებს

ვანისა და ბაღდათის მიტროპოლიტი მეუფე ანტონი თბილისში 5-6 ივლისს განვითარებულ მოვლენებზე პასუხისმგებლობას დიპლომატიურ კორპუსსა და ჟურნალისტებს აკისრებს.

მეუფე ანტონმა განაცხადა, რომ ელჩები და ჟურნალისტები მოძალადეები არიან.

"ერთი ადამიანი დაიღუპა და რა ამბავში ხართ - ალბათ, კარგი იქნებოდა, რომ მეთქვა ღმერთმა აცხოვნოს მისი სული. მე ვთქვი ერთი ადამიანი გარდაიცვალა მეთქი და რა ამბავში ხართ მეთქი...

შეტაკება რომ მომხდარიყო, სპეცტექნიკა რომ გამოეყვანათ და რასაც ითხოვდა ეს ელჩი, რომელიც დაგვიჯდა აქ და თითებს გვიქნევს, თვითონ მოძალადეები აქეთ რომ გვიწოდებენ მოძალადეებს, ტვინი რომ გამოგირეცხენ ნარკოტიკებით და ფსიქოტროპული წამლებით. თვითონ მოძალადეებო, აქეთ რომ გვიძახით მოძალადეებს, შეხედეთ რაებს წერთ და რაებს აკეთებთ. შეტაკება იქ გენახათ თქვენ სპეცტექნიკა რომ გამოსულიყო. დიახ თქვენ ხართ, თქვენ ახალისებთ, წირავთ ამ ხალხს...

პრაიდი იყო გამოცხადებული პირველ საათზე, ჩვენ გვქონდა ლოცვა 5 საათზე. საიდან იყო ეკლესიის მოწოდება? თქვენი ძალადობრივი სიმართლიდან ჩვენი სიმართლე რომ დავიცვათ, გვიწევს მოწოდება ხალხისათვის. ძალადობრივ სიმართლეს გვახვევთ თავზე. თქვენ ახალისებთ გარყვნილებას, თქვე მოძალადეებო! თქვენ უწევთ პროპაგანდას! თქვენ გარდააცვალეთ [ლექსო ლაშქარავა], თქვენზეა პასუხისმგებლობა... ხალხის სიმებს ეხებით, წირავთ ხალხს. თქვენ ხართ პასუხისმგებელი მაგის მკვლელობაზე... უმრავლესობას რატო გვილახავთ ღირსებას", - ამბობს მეუფე ანტონი.