როცა იზრდები სხვის რელიგიაზე, ქართველი ვეღარ ხარ - თეა დარჩია

"ჩემი აზრით, ქართველი მაშინ არის ქართველი, როცა არის მართლმადიდებელი", - ამის შესახებ მოცეკვავე და ქორეოგრაფმა თეა დარჩიამ "რადიო თავისუფლებასთან" ინტერვიუში განაცხადა.

"ჩემი აზრით, ქართველი მაშინ არის ქართველი, როცა არის მართლმადიდებელი, ცდილობს მაინც და როცა კითხულობს ბიბლიას ახალ აღთქმას, ფსალმუნს, ლოცვებს, ეზიარება და ცდილობს აღსარებაში იყოს გულწრფელი. ქართველმა თუ ყურანი ისწავლა და მუსლიმი გახდა - მე ეგ ისტორიიდან ვიცი, რომ ამას ისე ებრძოდნენ ქართველი მეფეები, რომ გოგოებში იმხელა თვითშეგნება იყო, თავს იკლავდნენ, რომ არ გამუსლიმანულიყვნენ...", - ამბობს თეა დარჩია.

მისი თქმით, ქართველი მხოლოდ მაშინ არის ქართველი, თუ ის მართლმადიდებელია.

"როცა იზრდები სხვის ადათ-წესებზე, სხვის რელიგიაზე, სხვის სწავლებებზე, ქართველი ვეღარ ხარ", - ამბობს დარჩია.

რამდენიმე დღის წინ, ტელეკომპანია "იმედის" ეთერში ნინოწმინდის პანსიონზე საუბრისას, თეა დარჩიამ განაცხადა, "ქართველი გოგოები ყურანს რომ სწავლობენ და კითხულობენ, აღარაფერი ქართული მათში აღარ არის". დარჩიას ეს განცხადება "სოლიდარობის თემმა" ისლამოფობის წამახალისებელ განცხადებად შეაფასა.

"რადიო თავისუფლების" შეკითხვაზე, იზიარებდა თუ არა "სოლიდარობის თემის" შეფასებას, დარჩია ამბობს, რომ "ყველას რწმენას პატივს სცემს", "არანაირი ფობიები არ აწუხებს" და "კარგ მთქმელს კარგი გამგონე უნდა".