ბოლო წლებია ლგბტ თემსა და მის მხარდამჭერებს საკუთარი კონსტიტუციური უფლების რეალიზაციაში ხელი ეშლებათ - ლომჯარია

სახალხო დამცველის, ნინო ლომჯარიას თქმით, წლებია ლგბტქ+ თემს და მათ მხარდამჭერებს საკუთარი კონსტიტუციური უფლების, შეკრებისა და მანიფესტაციის თავისუფლად განხორციელების რეალიზაციაში ხელი ეშლებათ. ამის შესახებ ომბუდსმენმა პარლამენტში გამოსვლისას ისაუბრა.
"კითხვა იყო, უნდა ჩატარდეს თუ არა ღირსების მარში. ამ საკითხთან დაკავშირებით სახალხო დამცველი წლებია, საუბრობს, 2012-2013 წლებიდან, როდესაც უკვე ძალადობრივ ქმედებებს ჰქონდა ადგილი იმ პირების მიმართ, რომლებიც თანასწორობის საკითხებზე გამოვიდნენ ქუჩაში და სურდათ საკუთარი აზრის გამოხატვა.

"ბოლო წლებია, ხელი ეშლებათ ლგბტ თემს და მის მხარდამჭერებს საკუთარი კონსტიტუციური უფლების რეალიზაციაში, შეკრებისა და მანიფესტაციის თავისუფლად განხორციელების რეალიზაციაში. მე ვფიქრობ, შსს-მ უნდა წარმოადგინოს ინფორმაცია, რა გააკეთა იმისთვის, რომ ამდენი წლის განმავლობაში, როდესაც ასეთი საფრთხე მუდმივად არსებობს, ეს საფრთხეები დაზღვეული იყოს.

არ შეიძლება ყოველწლიურად გვესმოდეს იმის შესახებ, რომ არსებობს კონკრეტული საფრთხეები და თუ საფრთხეები არსებობს, მაშინ უნდა გვესმოდეს, რას აკეთებს პრევენციისათვის სამართალდამცავი ორგანოები, რომ მოქალაქეებს ჰქონდეთ შეკრებისა და გამოხატვის თავისუფლება. მითუმეტეს, რომ საფრთხეების შესახებ წინასწარ არის გაცხადებული და ამ შემთხვევაში, პრევენციული ღონისძიებების გატარება უფრო მეტად რეალისტურია. ამიტომ, ჩვენ ველოდებით,რომ სამართალდამცავი ორგანოები პრევენციულად უზრუნველყოფენ ჩვენი მოქალაქეების გამოხატვის თავისუფლების დაცვას". – თქვა ნინო ლომჯარიამ.