დალაგება მინდა აქ სიტუაციის, გარედან ძალიან აურიეს - მეუფე იაკობი ნინოწმინდის პანსიონზე

"დალაგება მინდა აქ სიტუაციის, აი, გარედან ძალიან აურიეს" – თქვა ნინოწმინდის ბავშვთა პანსიონის ახალმა დირექტორმა, ბოდბელმა მიტროპოლიტმა იაკობმა. დაწესებულებაში სახალხო დამცველის შეშვებასთან დაკავშირებით კი განაცხადა, რომ მანამდე ნინო ლომჯარიას ჯერ თბილისში შეხვდება.

"სანამ არ გავერკვევი ბოლომდე, რა ხდება, მანამდე ახლა ბავშვებთან შეშვებაზე... ძალიან დასტრესილები არიან და, მით უმეტეს, ახლა შემოვიდნენ და კითხვები თუნდაც სახალხო დამცველმა დაუსვას... აქ მუშაობენ სოციალური მუშაკები, მონიტორინგიც აქვთ და 24 საათი აქ არიან, სანდო ხალხია. ცოტა ხანი დაგვაცადონ, პრობლემა არ გვაქვს. მე გუშინაც ვთქვი, ჯერ თბილისში შევხვდები, შემდგომ ცივილიზებულად დავილაპარაკებთ, არ ვარ ის ადამიანი, ყველანაირად ვიცი, სანამ ბავშვები ამ მდგომაროებაში არიან, მე მართალი ვიქნები, რომ არავინ არ მივაკარო ადვოკატის გარეშე. დალაგება მინდა აქ სიტუაციის, აი, გარედან ძალიან აურიეს". – თქვა მეუფე იაკობმა.

14 ივნისს ბოდბელი მთავარეპისკოპოსი იაკობ იაკობაშვილი ნინოწმინდის ბავშვთა პანსიონის ხელმძღვანელად დაინიშნა.

დღეს, 15 ივნისს სახალხო დამცველმა ნინო ლომჯარიამ კიდევ ერთხელ მიმართა საპატრიარქოს, რომ აპარატს მონიტორინგის საშუალება მიეცეს.