მარტვილისა და ჭყონდიდის ეპარქიის მიტროპოლიტმა სტეფანემ იღუმენ დანიელ გვილავას ხარისხი ჩამოართვა და განკვეთა

მარტვილისა და ჭყონდიდის ეპარქიის მიტროპოლიტმა სტეფანე კალაიჯიშვილმა სალხინოს მამათა მონასტრის წინამძღვარს, იღუმენ დანიელ გვილავას იღუმენის ხარისხი ჩამოართვა და განკვეთა.

როგორც მიტროპოლიტმა სტეფანემ, დღეს, მარტვილის საკათედრო ტაძარში საკვირაო ქადაგების დროს განაცხადა, იღუმენ დანიელ გვილავას ბრალად ედება საქართველოს მართლმადიდებელი ეკლესიის წინააღმდეგ მოწყობილ ამბოხში მონაწილეობა. 

„ეკლესიაშიც გამორჩეული ხალხი აღმოჩნდებიან თავისი ადამიანური სიჭარბით, როცა ვერ საზღვრავენ ღვთისას და თავისას, უკვე იწყება მათი განდგომილება ეკლესიიდან. ეკლესიასაც აქვს თავისი დამოკიდებულება, მაგრამ სინანულით ნებისმიერი ადამიანი უბრუნდება ქრისტეს. როცა მღვდელმთავარი უცერემონიოდ აცხადებს, პატრიარქს ბრალს დებს, ეს ჰაერში და ტელევიზიებში არ უნდა იყვირო, მოხვიდე და მოიტანო ბრალდება. ბრალდებები ისმის ყოველ წუთში, ეს არის სიტყვის თავისუფლებით შენიღბული. როცა შენ ხარ მღვდელი, მეტი პასუხისმგებლობა გმართებს“, – განაცხადა მიტროპოლიტმა სტეფანემ.