მივდივართ აქედან, მაგრამ ეს არ ნიშნავს, რომ აღარ ჩამოვალთ და აქ არ გავაგრძელებთ ბრძოლას - გოლეთიანი

ნამახვანჰესის საწინააღმდეგო აქციის მონაწილეები დღეს, 26 მაისს, რიონის ხეობაში ბრუნდებიან. აქციის ერთ-ერთი ორგანიზატორი, ვარლამ გოლეთიანი ამბობს, რომ "თუ საჭირო გახდება", ისინი თბილისში საპროტესტო აქციებს კვლავ გამართავენ.

"ჩვენ მივდივართ აქედან დღეს, მაგრამ ეს არ ნიშნავს იმას, რომ ჩვენ აქ აღარ ჩამოვალთ და, თუ საჭირო გახდება, აქ არ გავაგრძელებთ ბრძოლას. ჩვენ მივდივართ ბრძოლის წინა ხაზზე, სულ ცოტა ხანში დავიძრებიტ და ვიდგებით იქ, ვიდრე ეს პრობლემა არ გადაწყდება და მთელი საზოგადოება, ვინც დღეს თუნდაც არ იცის, რომ ჩვენ მართლები ვართ ამ ბრძოლაში და, შეიძლება, გახდა იმ სპეკულაციების მსხვერპლი, რასაც ისმენენ სოციალური თუ სატელევიზიო მედიიდან, ისინიც კი გაიგებენ, რომ ჩვენ ვართ მართალი ამ ბრძოლაში". - ამბობს ვარლამ გოლეთიანი.

ნამახვანჰესის მოწინააღმდეგეები თბილისში საპროტესტო აქციებსა და მსვლელობებს 4 დღის განმავლობაში მართავდნენ.